یمن: حوثی باغی اپنے دوسرے اہم گڑھ سے محروم

#یمن میں حکومتی فوج اور اس کی حامی نجی ملیشیا کی تازہ کارروائیوں کے نتیجے میں پانچ سال سے #حوثی باغیوں کے زیرقبضہ #الجوف گورنری کے الصفراء شہر کو باغیوں سے چھڑا لیا گیا ہے۔ الصفراء حوثی باغیوں کا صعدہ کے بعد دوسرا اہم ترین گڑھ اور دفاعی اعتبار سے نہایت اہمیت کا حامل مقام سمجھا جاتا ہے۔ الصفراء میں حوثیوں کی شکست باغیوں پر کاری ضرب کے مترادف ہے کیونکہ ایران نواز حوثی باغی گذشتہ پانچ سال سے اس علاقے پر قابض تھے۔

یمن کے مقامی ذرائع کے مطابق حکومتی فورسز اور مزاحمتی ملیشیا نے طویل لڑائی کے بعد باغیوں کو ان کے دوسرے اہم ترین گڑھ سے نکال باہر کیا ہے۔ حکومتی فورسز نے نہ صرف الصفراء کے علاقے کو باغیوں سے خالی کرا لیا بلکہ اس کے آس پاس میں واقع کئی اہم مقامات بھی باغیوں سے چھین لیے ہیں۔ الصفراء اور مضافاتی علاقوں کے چھن جانے کے بعد حوثی باغیوں اور #علی_صالح ملیشیا کی #صنعاء گورنری کے علاقے نھم سے جوف تک پھیلی سپلائی لائن بھی منقطع ہوگئی ہے۔

الصفراء پر حکومتی فورسز کے کنٹرول کے بعد الجوف اور اس کے قرب وجوار کے علاقوں کا محاصرہ توڑنے کی بھی راہ ہموار ہوچکی ہے۔ الصفراء سے بے دخل ہونے والے حوثی باغی اب الجوف کے مختلف محاذوں میں منقسم ہوچکے ہیں۔ باغی اپنے دوسرے ٹھکانوں تک پہنچنے کے لئے دور دراز کے صحرائی راستے اختیار کرنے پر مجبور ہیں۔

ادھر الجوف کے گورنر حسین العواضی کا کہنا ہے کہ حوثی ملیشیا نے حکومتی فورسز کی پیش قدمی روکنے کے لیے شہر کے گرد 30 ہزار سے زاید بارودی سرنگیں بچھا دی ہیں۔ اخباری نمائندوں سے بات کرتے ہوئے العواضی کا کہنا تھا کہ باغیوں کی جانب سے بچھائی گئی بارودی سرنگیں فورسز کی پیش قدمی میں رکاوٹ بن رہی ہیں جس کے نتیجے میں مختلف گورنریوں کو آزاد کرانے کا عمل متاثر ہوا ہے۔