سعودی خواتین کو ڈرائیونگ کی اجازت ملنے پر "ایوانکا" نے یہ کہا

امریکی صدر ڈونلڈ ٹرمپ کی بیٹی ایوانکا ٹرمپ نے مملکت میں ڈرائیونگ کی اجازت دیے جانے کے فیصلے پر سعودی خواتین کو مبارک باد پیش کی ہے۔

بدھ کے روز اپنی ٹوئیٹ میں ایوانکا نے کہا ہے کہ "خواتین کی ڈرائیونگ پر پابندی اٹھائے جانے کا فرمان جاری ہونے کے بعد آج سعودی عرب میں خواتین کے لیے تاریخی دن ہے"۔ انہوں نے کہا کہ یہ صحیح سمت میں ایک اہم اقدام ہے۔

شاہ سلمان نے منگل کے روز ایک شاہی فرمان میں خواتین کے لیے ڈرائیونگ لائسنس جاری کرنے کے احکامات دیے تھے۔ اس کے علاوہ ٹریفک قوانین کی پابندی اور اس کے ایگزیکٹو احکامات کو اپنانے کا بھی حکم دیا اور ساتھ ہی کہا کہ ملک میں مردو خواتین سب کو گاڑی چلاںے کی یکساں اجازت دی جائے۔

مقامی اور بین الاقوامی سطح پر اس فیصلے کی بھرپور پذیرائی کی جا رہی ہے۔

علاوہ ازیں سعودی ذمے داران اور میڈیا کی شخصیات کی جانب سے اس فیصلے کو بڑے پیمانے پر سراہا جا رہا ہے۔ اس حوالے سے " #الملك_ينتصر_لقيادة_المرأة" کے ہیش ٹیگ نے سعودی عرب میں ٹوئیٹر پر پہلی پوزیشن حاصل کر لی ہے۔