جامعہ الازہر کے سربراہ شیخ احمد طیب بھی جاگ گئے۔۔۔۔ !!

مصر کی سب سے بڑی دینی درس گاہ جامعہ الازھر کے سربراہ احمد الطیب رواں ماہ کے دوران بنگلہ دیش میں قائم روہنگیا کے مظلوم مسلمانوں کے پناہ گزین کیمپوں کا دورہ کریں گے اور متاثرین سے ملاقات کرکے ان کی دلجوئی کریں گے۔

جمعرات کو جامعہ الازھر کی طرف سے جاری کردہ ایک بیان میں کہا گیا تھا کہ شیخ الازھر آئندہ چند روز کے دوران بنگلہ دیش جائیں گے جہاں وہ برما سے ظلم کے نتیجے میں ھجرت کرکے وہاں پناہ لینے والے مظلوم مسلمانوں سے بھی ملاقات کریں گے۔ اس دورے کے دوران شیخ الازھر بنگلہ دیش کے حکومتی عہدیداروں اور دیگر سرکردہ رہ نماؤں سے بھی ملاقاتیں کریں گے۔

شیخ الازھر کے دورے کے حوالے سے جامعہ کے سیکرٹری عباس شومان اتوار کے روز ایک پریس کانفرنس میں تفصیلات بتائیں گے۔

جامعہ الازھر کے سربراہ کے دورہ بنگلہ دیش کے اعلان کے ساتھ ہی روہنگیا کے مظلوم مسلمانوں کے لیے الازھر کی طرف سے تیار کردہ امدادی سامان کا قافلہ روانہ کیا جا رہا ہے۔

گذشتہ اگست میں جامعہ الازھر میں روہنگیا نسل کے مسلمانوں کے خلاف برما کی فوج کی طرف سے وحشیانہ مظالم کی شدید الفاظ میں مذمت کرتے ہوئے وحشیانہ اور غیرانسانی کارروائیاں فوری طورپر بند کرنے کا مطالبہ کیا تھا۔

پچیس اگست اور اس کے بعد برما کی فوج نے ریاست راکھین اور کئی دوسرے علاقوں میں رہنے والے مسلمانوں کے خلاف وحشیانہ کریک ڈاؤن شروع کیا تھا۔ اس کریک ڈاؤن کے دوران ہزاروں کی تعداد میں نہتے مسلمانوں کو جن میں خواتین اور بچے بھی شامل تھے بے دردی سے شہید کردیا تھا۔ بدترین مظالم کے بعد 8 لاکھ 26 ہزار روہنگیا مسلمان موت کی وادیوں سے گذر کر بنگلہ دیش میں پناہ لینے پر مجبور ہوئے ہیں۔