حوثی ملیشیا اور علی صالح کے وفاداروں کا سعودی علاقے جازان کی جانب حملہ پسپا

سعودی عرب کی فورسز نے یمن سے دراندازی کرنے والے حوثی جنگجوؤں اور علی عبداللہ صالح کے وفاداروں کا جنوبی علاقے جازان کی جانب حملہ پسپا کردیا ہے اور جوابی کارروائی میں دسیوں حوثی جنگجو اور ان کے اتحادی مارے گئے ہیں۔

العربیہ کے نمائندے کی اطلاع کے مطابق حوثی ملیشیا کے جنگجو یمن سے سعودی سرحد عبور کرکے مختلف اطراف سے آگے بڑھے تھے اور وہ جازان میں فوج کی چوکیوں پر حملہ کرنا چاہتے تھے۔

سعودی فورسز نے ان حوثی جنگجوؤں کو دو بدو لڑائی کے بعد پسپا کردیا ہے۔ عرب اتحاد کے لڑاکا طیاروں نے بھی ان پر بمباری کی ہے اور حوثیوں کی مدد کو آنے والی کمک کو بھی نشانہ بنایا ہے۔

ذرائع نے اس بات کی تصدیق کی ہے کہ سعودی فورسز نے حوثی ملیشیا کے دسیوں جنگجوؤں کو ہلاک کردیا ہے اور ان کے اسلحہ ڈپوؤں کو فضائی بمباری کر کے تباہ کردیا ہے۔