حوثی باغیوں کے قدم اکھڑنے سے ان کا خاتمہ نوشتہ دیوار ہے: یمنی وزیر اعظم

پہلی اشاعت: آخری اپ ڈیٹ:
مطالعہ موڈ چلائیں
100% Font Size
دو منٹ read

یمنی وزیر اعظم احمد بن دغر نے کہا ہے کہ باغی حوثی ملیشیا کے قدم اکھڑ چکے ہیں اور ان کا حتمی خاتمہ نوشتہ دیوار ہے۔ "باغی ملیشیا کی صفوں میں شامل فریب خوردہ عناصر پر زور دیتا ہوں کہ وہ سیدھی راہ پر واپس آ جائیں اور یمنی فیڈریشن میں شامل سول حکومت کی مدد کریں۔"

بن دغر کا مزید کہنا تھا کہ یمنی عوام حوثیوں کے اس نظریہ کو قطعی طور پر قبول نہیں کریں گے جس کے تحت وہ یمن میں حکمرانی کو آفاقی حق سمجھتے ہیں۔

ان خیالات کا اظہار یمنی وزیر اعظم نے جمعہ کے روز البیضاء کے گورنر صالح الرصاص سے ٹیلی فون پر گفتگو کرتے ہوئے کیا۔ یمن کی سرکاری خبر رساں ایجنسی کے مطابق ٹیلی فونک بات چیت میں گورنر البیضاء نے انہیں عرب اتحاد کے تعاون سے سرکاری فوج کو ملنے والی کامیابیوں سے متعلق آگاہ کیا جو گورنری کو ایران نواز حوثی باغیوں سے آزاد کرانے کے سلسلے میں حاصل کی گئی ہیں۔

وزیر اعظم نے البیضاء گورنری کے مختلف محاذوں کو باغی ملیشیا کے چنگل سے آزاد کرانے کے لئے کی جانے والی کوششوں کو سراہا۔

اتحادی فوج کی حمایت سے اس وقت یمنی فوج اور عوامی مزاحمت کار البیضاء کو کئی اطراف سے مکمل طور پر آزاد کرانے کے لئے ایک لڑائی لڑ رہے ہیں جس میں انہیں باغی ملیشیا کا تسلط ختم کرانے میں مسلسل پیش قدمی حاصل ہو رہی ہے۔

یمن کی آٹھ گورنریوں میں البیضاء کو اسٹرٹیجک اہمیت حاصل ہے۔ اس میں فتح سے ذمار کی سمت ایک نیا محاذ کھولنے میں مدد ملے گی جو آگے چل کر دارلحکومت صنعاء کا محاصرہ کر کے آزاد کرانے اور بغاوت کے خاتمے میں مدد کرے گا۔

مقبول خبریں اہم خبریں

مقبول خبریں