اطالیہ کے قصبے میں مافیا کے دو سرغنوں کی رہائی کا جشن کس طرح منایا گیا ؟

اطالیہ کے شہر نیپولی کے نزدیک واقع رہائشی علاقے میں مافیا گینگ کے دو سرغنوں کی ہفتے کے روز جیل سے رہائی کے بعد بھرپور جشن منایا گیا۔ اطالوی میڈیا کے مطابق اس موقع پر علاقے کا سماں آتش بازی کے رنگوں سے بھر گیا۔

تفصیلات کے مطابق 48 سالہ جووانی ایلیانو اور 41 سالہ سیلویو ڈی لوکا نے بالترتیب آٹھ اور دس برس کی جیل کی سزا پوری کی۔ ان دونوں پر بلیک میلنگ کا الزام تھا۔

نیپولی کے مغرب میں ہونے والے اس جشن میں دونوں مافیا سرغںوں کے 100 کے قریب عزیز و اقارب اور دوستوں نے شرکت کی۔ اس موقع پر مشروبات پیش کیے جانے کے علاوہ آتش بازی کا بھی انتظام تھا۔

جشن منانے کے دوران نیپولی کے علاقے میں روایتی گیتوں کے حوالے سے معروف ایک عوامی گلوکار کو بھی مدعو کیا گیا تھا۔ گلوکار نے کئی گیت مافیا کے ان ارکان کے لیے پیش کیے جو ابھی تک جیل کی سلاخوں کے پیچھے موجود ہیں۔

اس تقریب اور جشن کی تصاویر اور وڈیوز سوشل میڈیا کے ذریعے وائرل ہو گئیں۔