اخوان المسلمون تخریبی منصوبے پرعمل پیرا ہے: سعودی وزیر برائے مذہبی امور

سعودی عرب کے وزیر برائے مذہبی امور عبداللطیف آل الشیخ نے کہا ہے کہ اسلام پسند مذہبی سیاسی جماعت اخوان المسلمون تخریبی پروگرام پرعمل پیرا ہے۔

العربیہ ڈاٹ نیٹ کے مطابق اپنے 'ٹویٹر' ہینڈل پر پوسٹ کردہ ایک بیان میں عبداللطیف آل الشیخ نے کہا کہ اخوان المسلمون اس وقت موجود ممالک کو تباہ کرکے اپنی مزعومہ مملکت قائم کرنا چاہتی ہے۔

انہوں نے مزید کہا کہ جو لوگ یہ سمجھتے ہیں کہ اخوان کا کوئی منصوبہ نہیں تو وہ حقیقت سے لا علم ہیں۔ حالانکہ اخوان لیڈروں حسن البنا، سید قطب، حسن الترابی، یوسف ندا، محمود عبدالحلیم اور یوسف القرضاوی نے ہمیشہ اپنے منصوبوں کا اعلانیہ اظہار کیا۔ وہ موجودہ ریاستوں کو ختم کرکے اپنی مزعومہ مملکت قائم کرنےکا خواب دیکھ رہےہیں۔

حال ہی میں سعودی وزیر مذہبی امور ڈاکٹر عبداللطیف آل الشیخ نے کہا تھا کہ اخوان المسلمون فلاحی اداروں کی آڑ میں اپنے سیاسی مقاصد کے حصول کے لیے فنڈز جمع کررہی ہے۔

انہوں نے کہا تھا کہ اخوان المسلمون خیانت، دھوکہ دہی اور اغواء برائے تاوان سمیت کئی دوسرے شیطانی حربے استعمال کررہی ہے تاکہ تنظیم مالی طور پرخود کو مضبوط کرکے اپنے مقاصد کو آگے بڑھا سکے۔ ان کا کہنا تھا کہ اخوان المسلمون اپنے تخریبی مشن کوآگے بڑھانے کے لیے خونی کارروائیوں سے بھی گریز نہیں کرتی۔