جان پر کھیل کر بچے کو سیلابی ریلے سے بچانے والے بہادر سعودی شہری کی تحسین

سعودی عرب کے شمال مغربی علاقے عسیر بارش کی وجہ سے آنے والے سیلاب میں ایک بچہ بہہ گیا تاہم ایک مقامی شہری نے اپنی جان پر کھیل کر بچے کو زندہ بچا لیا۔

اس واقعہ کی ایک فوٹیج سوشل میڈیا پر وائرل ہوئی ہے اور شہریوں نے بچے کی جان بچانے والے شہری کی تحسین کرتے ہوئے اسے ڈھیروں دعائیں دی ہیں۔

ویڈیو میں دیکھا جا سکتا ہے کہ ایک بچہ سیلابی ریلے میں بہہ گیا اور متعدد شہری اسے دیکھ رہے تھے۔ ایک شہری نے بچے کو بچانے کی کوشش کی تو لوگوں‌ نے اسے پانی میں داخل ہونے سے منع کیا تاہم اس نے لوگوں کی بات نہیں مانی اور وہ بچے کو بچانے کے لیے پانی میں کود گیا اور بچے کو بہ حفاظت نکال لایا۔

سوشل میڈیا پر وائرل ویڈیو میں بچے کی زندگی بچانے والے شخص کی شناخت 37 سالہ عامر بن موسیٰ الشھری کے نام سے کی گئی ہے۔ شہریوں نے بچے کی زندگی بچانے میں اس کی خدمات کو شاندار خراج تحسین پیش کیا ہے۔

مقامی شہریوں کا کہنا ہے کہ ایک مکان میں متعدد بچے جمع تھے کہ اچانک بارش کے پانی کی وجہ سے ایک ریلا آگیا۔ دیگر بچے تو وہاں سے نکل گئے مگر وہ کم سن ہونے وجہ سے وہاں سے نہ نکل سکا اور پانی میں بہہ گیا۔