عرب اتحاد کےلڑاکا طیاروں نے یمن کے تزویراتی اہمیت کے حامل شہرمآرب کے نواحی علاقوں میں حوثی ملیشیا کے خلاف فضائی مہم جاری رکھی ہوئی ہے۔گذشتہ 24 گھنٹے کے دوران میں عرب اتحاد فضائی بمباری کے نتیجے میں مزید138 حوثی جنگجو ہلاک ہوگئے ہیں۔
سعودی عرب کی سرکاری خبررساں ایجنسی (ایس پی اے) نے اتوار کو اطلاع دی ہے کہ عرب اتحاد نے حوثی ملیشیا کے خلاف 29 اہدافی کارروائیاں کی ہیں۔ان میں حوثی جنگجوؤں اور ان کے ٹھکانوں کو نشانہ بنایا گیا ہے اور فضائی بمباری میں ان کی 17 گاڑیاں بھی تباہ کردی گئی ہیں۔
عرب اتحاد کے لڑاکا طیاروں نے مآرب شہر کے جنوب میں 50 کلومیٹر دور واقع قصبے الجوبہ میں حوثی ملیشیا کی گاڑیوں اور ٹھکانوں کو نشانہ بنایا ہے۔اس کےعلاوہ شہرسے 30 کلومیٹرشمال مغرب میں واقع قصبے الکسارا میں بھی فضائی حملے کیے ہیں جن کے نتیجے میں حوثی ملیشیا کے کم سے کم 140جنگجومارے گئے ہیں۔
ایران کی حمایت یافتہ حوثی ملیشیا نے حالیہ ہفتوں کے دوران میں عرب اتحاد کے فضائی حملوں میں اپنے بھاری جانی نقصان کے بارے میں کوئی بیان جاری نہیں کیا ہے اور اس نے ماضی کی روایت کو برقرار رکھتے ہوئے خاموشی اختیارکررکھی ہے۔
