واگنر کی بغاوت نے 'پوتین حکومت کی کمزوری بے نقاب کر دی'

یوکرین کے صدر ولادی میر زیلنسکی نے امریکی صدر جو بائیڈن کے ساتھ ایک فون کال کے دوران روس میں تازہ ترین ہنگامہ آرائی اور واگنر کی بغاوت کو روسی صدر ولادی میر پوتین کی حکومت کی "کمزوری" قرار دیا۔

یوکرین کے ایوان صدر نے کہا کہ زیلنسکی اور بائیڈن نے روس میں ہونے والی پیش رفت کے بارے میں اپنے جائزے شیئر کیے ہیں۔

زیلنسکی نے کہا: "کل کے واقعات نے پوتن کی حکومت کی کمزوری کو بے نقاب کر دیا ہے۔" انہوں نے مزید کہا کہ عالمی امن بحال ہونے تک دنیا کو روس پر دباؤ ڈالنا چاہیے۔

دونوں رہنماؤں نے دفاعی تعاون کو مزید وسعت دینے پر بھی تبادلہ خیال کیا، خاص طور پر طویل فاصلے تک مار کرنے والے ہتھیاروں کے ساتھ میدان جنگ میں یوکرین کی فائر پاور میں اضافے سے متعلق بات کی۔

زیلنسکی نے امریکی حمایت کے لیے بائیڈن کا شکریہ ادا کرتے ہوئے کہا کہ "میں بین الاقوامی طور پر تسلیم شدہ سرحدوں کے اندر ہمارے تمام علاقوں کی مکمل آزادی تک یوکرین کے ساتھ شانہ بشانہ کھڑے ہونے کے لیے آپ کی اور امریکی عوام کی حمایت کا مشکور ہوں۔"

اس بارے میں وائٹ ہاؤس نے کہا ہے کہ دونوں رہنماؤں نے روس میں ہونے والے حالیہ واقعات پر تبادلہ خیال کیا، لیکن مزید تفصیل فراہم نہیں کیں۔

بیان میں کہا گیا ہے کہ دونوں صدور نے یوکرین کی جاری جوابی کارروائی پر تبادلہ خیال کیا، اور بائیڈن نے مسلسل سلامتی، اقتصادی اور انسانی امداد سمیت غیر متزلزل امریکی حمایت کی تصدیق کی۔

واضح رہے کہ روسی کرائے کی فوج واگنر گروپ کے سربراہ ایوگینی پریگوزن نے اپنی مسلح بغاوت کے ذریعے روس کی حالیہ تاریخ میں ایک بے مثال سیاسی بحران کو جنم دیا ہے، جس میں جمعہ کو انہوں نے ملک کے فوجی درجہ بندی کو ختم کرنے کا بھی عہد کیا۔

ہفتے کے آخر میں، پریگوزن نے اپنے فوجیوں کو جنوبی روس میں ایک اہم فوجی اڈے پر قبضہ کرنے اور ماسکو پر مارچ شروع کرنے کی ہدایت کی۔

یہ بغاوت کیسے شروع ہوئی اور ختم ہوئی اس کی اچانک نوعیت نے روس کے اندر اور بین الاقوامی سطح پر بہت سے لوگوں کو حیران کیا ہے۔