سعودی وزیر دفاع کا اپنے چینی ہم منصب سے دو طرفہ تعلقات پر تبادلہ خیال

سعودی عرب کے وزیر دفاع شہزادہ خالد بن سلمان بن عبدالعزیز کے دورہ چین کے موقعے پر بیجنگ میں عوامی جمہوریہ چین کے وزیر دفاع لیفٹیننٹ جنرل ڈونگ جون نے ان کا استقبال کیا۔

سعودی وزیر دفاع اور ان کے چینی ہم منصب نے دونوں ممالک کے وفود کی موجودگی میں باضابطہ بات چیت کی۔ ملاقات میں سعودی عرب اور جمہوریہ چین کے درمیان تعلقات اور سٹریٹجک دفاعی شراکت داری کو مضبوط بنانے پر اتفاق کیا گیا۔

سعودی خبر رساں ایجنسی "ایس پی اے‘‘ کی رپورٹ کے مطابق دونوں دوست ممالک کے وزرائے دفاع نے مشترکہ مفادات کے فروغ، دونوں دوست ممالک کی قیادت کی خواہشات کے حصول کے لیے بین الاقوامی امن و سلامتی کو برقرار رکھنے اور مشترکہ رابطہ کاری کی کوششوں پر بھی تبادلہ خیال کیا۔

اپنے دورہ چین کے دوران وزیر دفاع شہزادہ خالد بن سلمان نے عوامی جمہوریہ چین کے مرکزی فوجی کمیشن کے وائس چیئرمین لیفٹیننٹ جنرل ژانگ یوشیا سے ملاقات کی۔ ملاقات کے دوران دونوں دوست ممالک کے درمیان اسٹریٹجک تعلقات کی اہمیت پر زور دیا گیا۔ اس کے علاوہ فوجی اور دفاعی شعبے میں دوطرفہ تعاون کے امکانات کو تقویت دینے کے طریقوں پر تبادلہ خیال کے علاوہ علاقائی اور بین الاقوامی مسائل میں نمایاں پیش رفت اور ان کے حوالے سے کی جانے والی کوششوں اور مشترکہ دلچسپی کے متعدد امور پر تبادلہ خیال کیا گیا۔