سعودی عرب: حج کے پیکجز سے متعلق فرضی اشتہارات، تین تارکین وطن زیر حراست

مکہ مکرمہ میں سیکیورٹی فورسز نے تین انڈونیشین تارکین وطن کو گرفتار کر لیا ہے، جو سوشل میڈیا کے ذریعے جعلی حج پیکج کے گمراہ کن اشتہارات پھیلا کر دھوکہ دہی میں ملوث تھے۔

ان اشتہارات میں مقدس مقامات پر حاجیوں کے لیے رہائش اور نقل و حمل کی سہولیات کی فراہمی کا جھوٹا دعویٰ کیا گیا تھا۔ ملزمان کو گرفتار کر کے ان کے خلاف قانونی کارروائیاں مکمل کی گئیں اور انھیں مزید تفتیش کے لیے پبلک پراسیکیوشن کے حوالے کر دیا گیا ہے۔

عوامی سلامتی کے ادارے نے شہریوں اور تارکین وطن سے اپیل کی ہے کہ وہ حج سے متعلقہ ضوابط و ہدایات کی مکمل پابندی کریں، اور کسی بھی قسم کی خلاف ورزی کی صورت میں فوری اطلاع دیں۔ مکہ مکرمہ، مدینہ منورہ، ریاض اور الشرقیہ صوبوں کے لیے رابطہ نمبر (911) ہے، جب کہ مملکت کے باقی تمام صوبوں میں (999) پر اطلاع دی جا سکتی ہے۔