خادم الحرمین الشریفین کی طرف سے اور وزارتِ اسلامی امور کے زیرِ نگرانی مہمانوں کے حج و عمرہ پروگرام کے زیرِ اہتمام متعدد فلسطینی عازمینِ حج نے سعودی مملکت کا شکریہ ادا کیا ہے۔
سعودی پریس ایجنسی کی رپورٹ کے مطابق انھوں نے کہا، یہ اقدام تمام دنیا کے مسلمانوں کے لیے شاہ سلمان کی نگہداشت اور اس بات کو یقینی بنانے کے لیے ان کے عزم کی عکاسی کرتا ہے کہ وہ باوقار اور باسہولت طریقے سے حج ادا کر سکیں۔
فلسطینی حاجی ایمن صالح نے اس سال حج کے لیے منتخب ہونے پر نہایت خوشی کا اظہار کیا اور فلسطینی عازمین کے لیے غیر معمولی خدمات اور پرتپاک استقبال پر سعودی قیادت کا شکریہ ادا کیا۔
حاجی حسین کمال نے شاندار سہولیات کی تعریف کرتے ہوئے کہا، اس سے فلسطینی حجاج کی خدمت اور انہیں اطمینان سے حج کرنے میں مدد دینے کے لیے مملکت کی لگن کی عکاسی ہوتی ہے۔ انہوں نے اس فراخدلانہ اقدام پر سعودی قیادت کی بہت زیادہ تعریف کی۔
اس پروگرام کے تحت فلسطینی سیاسی قیدیوں اور شہداء کے سینکڑوں رشتہ دار فریضۂ حج ادا کرنے پہنچ چکے ہیں۔ وزارتِ اسلامی امور نے پیر کے روز غزہ سے 500 عازمینِ حج کا استقبال کیا جس سے فلسطینی حجاج کی کل تعداد ایک ہزار ہو گئی۔
خادم الحرمین الشریفین نے 1996 میں پروگرام کے آغاز سے اب تک ہزاروں حجاج اور عمرہ زائرین کی میزبانی کی ہے۔ اس سال یہ پروگرام 100 ممالک کے 2,443 عازمین کی میزبانی کر رہا ہے۔
