تاریخ سے ... تقریبا 218 سال قبل ایک معاہدے نے نپولین اور روس کی جنگ ختم کر دی

فرانسیسی انقلاب کے ابتدائی برسوں سے یورپی بر اعظم مسلسل خون ریز جنگوں کی لپیٹ میں رہا۔ ان جنگوں نے فرانسیسیوں اور ان کے اتحادیوں کو بار بار ایسی اتحادی طاقتوں کے سامنے لا کھڑا کیا، جو یورپ میں فرانسیسی انقلاب، اس کی نظریاتی بنیادوں اور فرانس کے بڑھتے ہوئے اثر و رسوخ کو روکنے کے لیے یکجا ہوئی تھیں۔

اکتوبر 1806 سے جولائی 1807 تک، یورپ نو ماہ تک چوتھی اتحادی جنگ کے زیرِ اثر رہا، جس میں بنیادی طور پر فرانس کا سامنا برطانیہ، پروشیا (پروسیا) اور روس سے تھا۔ جنگ کے آخری ایّام میں روس نے اس خون ریز تصادم سے نکلنے اور وقتی طور پر فرانس سے اتحاد کرنے کے لیے نپولین بوناپارٹ سے معاہدہ کرنے میں کوئی تردد نہ کیا۔

نپولین بوناپارٹ اور الیگزینڈر اوّل کی ملاقات

چوتھی جنگِ اتحاد کے دوران، 14 جون 1807 کو روسی افواج کو فریڈلینڈ کی لڑائی میں زبردست شکست کا سامنا کرنا پڑا، جو پروشیا کی سرزمین پر لڑی گئی۔ اس معرکے میں روس کے تقریباً 20 سے 40 ہزار فوجی یا تو مارے گئے، زخمی ہوئے یا قید کر لیے گئے۔ یہ شکست روسی افواج کے حوصلے کے لیے شدید دھچکا ثابت ہوئی اور نپولین بوناپارٹ پر فتح پانے کی امیدیں مدہم پڑ گئیں۔

ایسے حالات میں روسی شہنشاہ الیگزینڈر اوّل نے جنگ ختم کرنے کی خواہش ظاہر کی اور نپولین سے براہِ راست ملاقات پر آمادگی ظاہر کی تاکہ دونوں ممالک کے درمیان امن معاہدہ طے پا سکے۔

25 جون 1807 کو دریائے نیمان کے درمیان ایک بیڑے پر فرانس کے حکمراں نپولین بوناپارٹ اور روس کے شہنشاہ الیگزینڈر اوّل کی ملاقات ہوئی۔ اس ملاقات میں الیگزینڈر اوّل نے برطانویوں اور ان کی یورپی بالادستی کی پالیسیوں سے اپنی شدید نفرت کا اظہار کیا۔ نپولین نے ان خیالات کا خیر مقدم کیا، جس نے دونوں ممالک کو باہمی مفاہمت کی راہ پر ڈال دیا۔

تلسیت کا امن

بعد ازاں 7 جولائی 1807 کو تلسیت شہر میں فرانس اور روس نے باقاعدہ امن معاہدے پر دستخط کیے، جس سے دونوں ممالک کے درمیان جنگ ختم ہو گئی۔ اس معاہدے کے تحت، دونوں نے برطانیہ کے خلاف ایک مشترکہ اتحاد پر اتفاق کیا، اور روس نے "برطانوی تجارتی ناکہ بندی" میں شامل ہوتے ہوئے اپنی بندرگاہیں برطانوی تجارتی جہازوں کے لیے بند کر دیں۔

نپولین نے روس کو قائل کیا کہ وہ فن لینڈ اور سویڈن کے درمیان تنازع کو ہوا دے تاکہ سویڈن بھی برطانیہ کے ساتھ اپنے تجارتی تعلقات ختم کرنے پر مجبور ہو جائے۔

اس کے بدلے، نپولین بوناپارٹ نے روس کو سلطنتِ عثمانیہ کے خلاف تعاون کی پیش کش کی۔

اس معاہدے کے تحت، روس نے مولدووا اور والاچیا سے انخلا پر آمادگی ظاہر کی اور آیونیائی جزائر فرانس کے حوالے کر دیے۔
اس کے بدلے میں نپولین نے اولڈنبرگ کی ڈچی (Duchy of Oldenburg) اور جرمنی کی چند چھوٹی ریاستوں پر روسی شہنشاہ کے رشتے داروں کی خود مختاری تسلیم کر لی۔

فرانس اور روس کے درمیان اس معاہدے کے فوری بعد، پروشیا نے بھی جنگ سے دست برداری کا فیصلہ کیا اور دو دن بعد تلسیت میں فرانس سے امن معاہدہ کر لیا، جس میں اس نے نپولین کی شرائط قبول کر لیں۔