جدہ کی تاریخی "رواشین".... وقت سے ماورا لکڑی کے آثار

جدہ کی تاریخی عمارتوں کے بیرونی حصوں کو سجانے والی لکڑی کی "رواشین" صرف ایک آرائشی عنصر نہیں بلکہ شہر کی معمارانہ شناخت کا اہم حصہ ہیں۔ عربی زبان میں "رواشین" کے معنی ہیں " کھڑکیوں اور بیرونی سوراخوں پر لگایا جانے والا ابھرا ہوا پردہ"۔ لکڑی کی مذکورہ رواشین مقامی کاری گروں کی تخلیقی صلاحیت کو ظاہر کرتی ہیں جنہوں نے حسن اور افادیت کو یکجا کر کے ایک ایسا بصری منظر تخلیق کیا جو شہر کی تہذیبی گہرائی کا آئینہ ہے۔ ثقافتی میدان میں ان رواشین کو نئے تناظر میں پیش کیا جا رہا ہے تاکہ نوجوان نسل اپنے موروثی حسن کو دریافت کر سکے۔ یہ کاوش سعودی عرب کی ان کوششوں کا حصہ ہے جو مادی اور غیر مادی ورثے کے تحفظ اور اسے موجودہ دور کے تناظر میں پیش کرنے پر مرکوز ہیں، بالخصوص وژن 2030 کے اہداف کے مطابق۔

رواشین جدہ کی تاریخی عمارتوں کے مخصوص معمارانہ طرز کا حصہ ہیں۔ اس میں لکڑی کے تختوں پر باریک اور پیچیدہ جیومیٹریائی نقوش تراشے جاتے ہیں، جن کے درمیان چھوٹے چھوٹے خلا ہوتے ہیں۔ ان کی ابتدا چھٹی صدی ہجری کے آخر میں سمجھی جاتی ہے اور وقت گزرنے کے ساتھ یہ بحیرہ احمر کے ساحل پر واقع بڑے شہروں کی علامتی پہچان بن گئیں۔

رواشین صرف آرائشی نہیں بلکہ عملی افادیت بھی رکھتی ہیں۔ یہ روشنی اور ہوا کے گزر کو ممکن بناتی ہیں جبکہ اندرونی نجی زندگی کا تحفظ بھی کرتی ہیں۔ ان کی تیاری میں اعلیٰ معیار کی لکڑیاں جیسے ٹیک اور صندل استعمال ہوتی ہیں۔ ان کے مراحل میں پیمائش، لکڑی کاٹنا، تراشنا، نقاشی اور آخر میں موسمی اثرات سے بچانے کے لیے خصوصی مواد سے تحفظ شامل ہے۔ اصل رنگ بھورا اور اس کے شیڈز تھے، تاہم مختلف ادوار میں یہ سبز اور نیلا بھی اختیار کرتے رہے تاکہ عمارتوں کے ساتھ ہم آہنگی قائم رہے۔

ثقافتی میدان ان روایتی عناصر کو ایک معاصر زبان میں زندہ کرتا ہے۔ اس کی عمارتوں میں دھکیلنے اور کھینچنے کی تکنیک استعمال ہوئی ہے جس سے ڈیزائن میں حرکت اور روشنی کا پہلو ابھرتا ہے، بالکل ویسا جیسا پرانی جدہ کی عمارتوں کے عمودی طرز اور غیر متوازی محاذوں سے جھلکتا تھا۔ اس منصوبے میں دیگر روایتی عناصر جیسے چھت والی بالکونیاں، محرابیں اور لکڑی کے تاج بھی شامل کیے گئے ہیں، جو رواشین کے ساتھ مل کر ایک ایسا ڈیزائن پیش کرتے ہیں جس میں ورثے کی شناخت بھی محفوظ ہے اور جدید دور کی جمالیات بھی۔