یمن میں حوثیوں کے فوجی ترجمان نے آج پیر کے روز اعلان کیا ہے کہ ان کی جماعت نے بحیرہ احمر میں "اسکارلٹ رے" نامی جہاز کی طرف ایک بیلسٹک میزائل داغا۔
اس سے پہلے دو برطانوی سمندری تنظیموں نے اطلاع دی تھی کہ انھیں بحیرہ احمر میں ایک واقعے کی رپورٹ موصول ہوئی ہے۔ برطانیہ کی میری ٹائم ٹریڈ آپریشنز اتھارٹی نے بتایا کہ حوثیوں نے ایک جہاز کو نشانہ بنایا اور جہاز نے اطلاع دی کہ اس کے قریب ایک "نامعلوم چیز" گری اور زوردار دھماکے کی آواز سنائی دی۔ تاہم تمام عملہ محفوظ ہے اور جہاز کا سفر جاری ہے۔
اسی دوران برطانوی میری ٹائم سیکیورٹی کمپنی "ایمبری" نے بتایا کہ متاثرہ جہاز لائبیریا کے پرچم تلے چل رہا تھا، مگر اس کی ملکیت اسرائیل کے پاس ہے۔ لہذا یہ حوثیوں کے اہداف میں شامل تھا۔
خیال رہے کہ یمنی حوثی ملیشیا 2023 سے بحیرہ احمر میں جہازوں پر حملے کر رہی ہے۔
حوثی رہنما عبد الملک الحوثی نے اسرائیل کو مزید حملوں کی دھمکی دی ہے اور کہا ہے کہ یہ سلسلہ نہ رکے گا نہ کمزور پڑے گا۔ ان کی یہ دھمکی جمعرات کو اسرائیلی حملے کے بعد سامنے آئی، جس میں "حوثی حکومت" (جو عالمی سطح پر تسلیم شدہ نہیں) کے وزیر اعظم اور متعدد سیاسی و سیکیورٹی رہنما مارے گئے تھے۔عبد الملک الحوثی نے کہا کہ اسرائیل کے خلاف حوثی تحریک کی عسکری پالیسی "مستحکم اور واضح" ہے۔ اب میزائل حملے، ڈرون کارروائیاں اور بحری محاصرہ مزید تیز کیے جائیں گے۔
