حلب کے دیہی علاقے پر سیرین ڈیموکریٹک فورسز کے حملے میں دو افراد جاں بحق اور تین زخمی

شامی وزارتِ دفاع نے اعلان کیا ہے کہ "سیرین ڈیموکریٹک فورسز" (ایس ڈی ایف) نے مشرقی حلب کے دیہی علاقوں میں شدید گولہ باری کی۔ یہ کارروائی مذکورہ فورسز کے زیر کنٹرول الجراح فضائی اڈے اور مسکنہ شہر کے اطراف سے کی گئی۔ اس گولہ باری میں حلب کے مشرقی دیہات الکیاریہ، رسم الاحمر اور حبوبۃ کبیر میں عام شہریوں کے گھروں کو نشانہ بنایا گیا۔ گولہ باری کے نتیجے میں دو شہری جاں بحق اور تین زخمی ہوگئے۔

وزارت کے ایک ذریعے نے "سانا" نیوز ایجنسی کو بتایا کہ ایس ڈی ایف کی اس جارحیت کے بعد علاقے میں تعینات شامی افواج کو چوکنا کر دیا گیا اور انھوں نے گولہ باری کے ذرائع کو نشانہ بنانا شروع کر دیا۔