"جی سیون" ممالک کا اقوام متحدہ سے غزہ امن منصوبے کے نفاذ کا مینڈیٹ حاصل کرنے کا عزم

جرمنی کے وزیرِ خارجہ یوہان فادیفول نے کہا ہے کہ جی سیون ممالک اقوامِ متحدہ کی سلامتی کونسل سے ایسا اختیار حاصل کرنے کی کوشش کر رہے ہیں، جس کے تحت غزہ میں امن منصوبے پر فوری عمل درآمد ممکن بنایا جا سکے۔

کینیڈا کے صوبے اونٹاریو کے شہر نیاگارا آن دی لیک میں جاری جی سیون وزرائے خارجہ اجلاس میں گفتگو کرتے ہوئے فادیفول نے بتایا کہ اس مینڈیٹ کا مقصد حماس کو غیر مسلح کرنا اور غزہ کی انتظامیہ کو ایک بین الاقوامی سکیورٹی فورس کے سپرد کرنا ہے۔

انہوں نے کہا کہ وزرائے خارجہ نے منگل کی شام افتتاحی اجلاس میں اس معاملے پر تفصیلی گفتگو کی اور اس بات پر اتفاق کیا کہ سلامتی کونسل کا اختیار حاصل کرنا ضروری ہے اور اس کے لیے فوری اقدامات کیے جانے چاہییں۔ تاہم انہوں نے خبردار کیا کہ ایسے فیصلے زبردستی نافذ نہیں کیے جا سکتے بلکہ سنجیدہ مذاکرات کے ذریعے طے کرنا ہوں گے۔

فادیفول کے مطابق وقت تیزی سے گزر رہا ہے اور غزہ میں نظم و نسق برقرار رکھنے کے لیے فوری سکیورٹی ڈھانچے کی ضرورت ہے۔

خیال رہے کہ جی سیون میں جرمنی، امریکہ، فرانس، اٹلی، جاپان، برطانیہ اور کینیڈا شامل ہیں۔