فضائی کمپنی نے ایک تصویر سے بحث چھیڑ دی … طنزیہ پوسٹ گلوبل ٹرینڈ میں تبدیل !

آئرلینڈ کی کم لاگت والی فضائی کمپنی ریان ایئر(Ryanair) نے ایک بار پھر ہوائی جہازوں میں "کھڑے ہو کر سفر کرنے والی نشستوں" کے معاملے پر بحث چھیڑ دی ہے۔

بات اس وقت شروع ہوئی جب ایکس پلیٹ فارم کے ایک صارف نے ایسے مسافروں کی تصویر پوسٹ کی جنھیں کھڑے ہوئے دیکھا جا سکتا ہے اور اُن کے کانوں میں ہیڈ فون لگے ہوئے ہیں۔ صارف نے تصویر کے ساتھ لکھا "یہ ریان ایئر کے ساتھ سستے فضائی سفر کا مستقبل ہے… لیکن اگر آپ کے پاؤں کا سائز 10/11 سے بڑا ہے، تو آپ کو ٹکٹ کی قیمت کا 15 فی صد اضافی ادا کرنا پڑے گا"۔
اس پوسٹ کے سامنے آتے ہی بحث اور طنز کا ایک طوفان برپا ہو گیا !

لیکن اصل حیرت ریان ایئر کے فوری اور طنزیہ جواب سے ہوئی، جہاں کمپنی نے لکھا "لیکن ہم کبھی ہیڈ فون مفت تقسیم نہیں کریں گے!"

یہ مختصر سا جواب ٹویٹر پر تیزی سے گلوبل ٹرینڈ بن گیا، اور چند گھنٹوں میں ہی پوسٹ کو ایک کروڑ 10 لاکھ سے زیادہ بار دیکھا گیا، جبکہ سوشل میڈیا پر اس طرزِ سفر کے حامی اور مخالف دونوں فریقوں کی جانب سے بھرپور بحث شروع ہو گئی۔

یہ بات یاد رہے کہ ریان ایئر نے ماضی میں واقعی ایسی نشستوں کا تصور پیش کیا تھا جو سائیکل کی سیٹوں سے مشابہت رکھتی ہیں، مگر کمپنی کے سی ای او مائیکل اولیری پہلے ہی واضح کر چکے ہیں کہ یہ معاملہ دراصل ایک اشتہاری مذاق یا مارکیٹنگ کا حربہ تھا، نہ کہ کوئی حقیقی منصوبہ۔

اس کے علاوہ اگرچہ یہ طریقہ بظاہر زیادہ سستا اور کم خرچ ہے، لیکن تھکاوٹ اور طویل سفر جیسے عوامل کے باعث اس میں کئی عملی مشکلات موجود ہیں۔

اور اب اصل سوال یہ ہے ... کیا آپ کم قیمت والے ٹکٹ کے عوض اس طرح کھڑے ہو کر سفر کرنا قبول کریں گے؟