ٹرمپ اور مادورو نے گذشتہ ہفتے ٹیلی فون پر بات چیت کی : نیویارک ٹائمز

امریکی اخبار ”نیو یارک ٹائمز“ نے با خبر ذرائع کے حوالے سے بتایا ہے کہ امریکی صدر ڈونلڈ ٹرمپ نے گذشتہ ہفتے وینزویلا کے ہم منصب نکولاس مادورو سے ٹیلیفون پر گفتگو کی۔ دونوں رہنماؤں نے امریکہ میں ایک ممکنہ ملاقات کے انعقاد پر بات چیت کی۔

اخبار نے جمعے کے روز مزید لکھا کہ فی الحال ایسی کسی ملاقات کا کوئی منصوبہ موجود نہیں ہے اور اگر یہ ملاقات ہوتی ہے تو یہ موجودہ وینزویلائی صدر اور کسی بھی امریکی صدر کے درمیان ہونے والی اپنی نوعیت کی پہلی ملاقات ہو گی۔

وائٹ ہاؤس نے ’نیو یارک ٹائمز‘ کی اس رپورٹ پر کوئی تبصرہ نہیں کیا، جس میں اشارہ دیا گیا تھا کہ وزیرِ خارجہ مارکو روبیو بھی اس ٹیلیفونک گفتگو میں شریک تھے۔

یہ اطلاعات ایسے وقت سامنے آئی ہیں جب ٹرمپ وینزویلا کے حوالے سے سخت بیانیہ اختیار کیے ہوئے ہیں ... اگرچہ وہ ہمیشہ اس بات کا امکان بھی ظاہر کرتے رہے ہیں کہ طاقت کے بجائے سفارت کاری کا راستہ اپنایا جا سکتا ہے۔

ٹرمپ انتظامیہ نے مادورو کو "غیر قانونی رہنما" قرار دیتے ہوئے الزام عائد کیا ہے کہ وہ “کارٹیل دے لوس سولیس“ نامی منشیات اسمگلنگ کے نیٹ ورک کی سربراہی کر رہے ہیں۔ کراکس نے ان الزامات کی تردید کی ہے۔

امریکی حکومت گذشتہ سال ستمبر کے اوائل سے ان کشتیوں کو نشانہ بنا رہی ہے جو اس کے مطابق وینزویلا اور لاطینی امریکہ کے دیگر ممالک سے منشیات لے کر آتی ہیں۔

ٹرمپ نے جمعرات کو ایک بار پھر اپنے پچھلے انتباہات دہراتے ہوئے وینزویلا میں زمینی اہداف کو نشانہ بنانے کے حملے شروع کرنے کی دھمکی دی۔ مسلح افواج کے ساتھ ایک ٹیلی وژن گفتگو کے دوران امریکی صدر نے کہا "آپ نے غالباً نوٹ کیا ہوگا کہ لوگ اب منشیات کو سمندر کے راستے منتقل کرنے کے خواہش مند نہیں رہے، اور ہم انہیں زمین کے راستے بھی ایسا کرنے نہیں دیں گے۔"