"درع الوطن"فورسز کے"جنوبی عبوری کونسل" کی جانب سے بریگیڈ 37 کے کیمپ کی حوالگی کے انتظامات

یمن میں درع الوطن فورسز نے بریگیڈ 37 کے کیمپ کا کنٹرول سنبھالنے کے لیے کارروائی کے انتظامات شروع کر دیے ہیں جبکہ جنوبی عبوری کونسل کی فورسز اپنی سابقہ پوزیشنوں پر واپس جا رہی ہیں۔ العربیہ ذرائع نے صفوں کی یکجہتی برقرار رکھنے، قومی مفاد کو ترجیح دینے اور خون ریزی سے بچنے کی تصدیق کی ہے۔

جنوبی عبوری کونسل کی فورسز نے مشرقی یمن کے صوبہ حضرموت میں اپنے کیمپوں اور ٹھکانوں کو درع الوطن فورسز کے حوالے کرنے کا اعلان کیا ہے۔

آج جمعرات کے روز صبح سویرے جاری ہونے والے ایک بیان میں جسے نام نہاد جنوبی مسلح افواج سے منسوب کیا گیا، بتایا گیا کہ حضرموت کے علاقے ثمود میں درع الوطن فورسز کی دوبارہ تعیناتی کو ابتدائی قدم کے طور پر انجام دیا گیا ہے۔ بیان میں واضح کیا گیا کہ معاہدے کے مطابق درع الوطن کے دیگر یونٹوں کو رمات اور حضرموت و المہرہ کے دیگر علاقوں میں بھی دوبارہ تعینات کیا جائے گا۔

بیان کے مطابق یہ تنظیم اور تعیناتی اتحادی ممالک کے برادران کی قابل قدر کوششوں کے ساتھ ہم آہنگی کے تناظر میں کی جا رہی ہے۔

ادھر حضرموت میں قبائلی اتحاد کے میڈیا ذمہ دار صبری بن مخاشن نے العربیہ سے خصوصی گفتگو میں بتایا کہ عینی شاہدین نے بعض علاقوں سے جنوبی عبوری کونسل کی فورسز کے انخلا کا مشاہدہ کیا ہے۔ انہوں نے کہا کہ یمنی صدارتی قیادت کونسل اور سعودی عرب خونریزی روکنے اور کشیدگی میں اضافے سے بچنے کے لیے کوشاں ہیں۔

ترجمان نے مزید وضاحت کی کہ جن علاقوں سے عبوری کونسل کا انخلا عمل میں آیا ہے وہاں خوشی کی تقریبات شروع ہو گئیں، اور یہ بھی کہا کہ اگر عبوری کونسل کی فورسز پیچھے ہٹتی ہیں تو مذاکرات کا راستہ کھلا رہے گا۔