زیرِ زمین محفوظ پناہ گاہ میں مقیم وینزویلا کے صدر نکولس مادورو کو کیسے گرفتار کیا گیا؟

بغیر کسی پیشگی تفصیل کے امریکی صدر ڈونلڈ ٹرمپ نے اچانک اعلان کیا کہ وینزویلا کے صدر نکولس مادورو کو ان کی اہلیہ سمیت گرفتار کر لیا گیا ہے۔

بعد ازاں عسکری ذرائع نے بتایا کہ امریکی فوج کی ایلیٹ فورس سمجھی جانے والی ڈیلٹا فورسز کے کمانڈوز نے مادورو اور ان کی اہلیہ کو حراست میں لیا۔

تاہم سوال یہ ہے کہ یہ گرفتاری کیسے عمل میں آئی اور کہاں سے کی گئی؟

ابتدا میں یہ واضح کرنا ضروری ہے کہ رات کے وقت وینزویلا کو نشانہ بنانے والے حملوں میں فورٹ ٹیونا فوجی کمپلیکس بھی شامل تھا جو ملک کا سب سے بڑا عسکری مرکز ہے۔

اسی بنا پر خیال کیا جا رہا ہے کہ یہ حملے خصوصی فورسز کو تحفظ فراہم کرنے کے لیے کیے گئے تاکہ وہ وہاں سے مادورو اور ان کی اہلیہ کو نکال سکیں۔

خاص طور پر اس لیے کہ بڑے پیمانے پر یہ تصور کیا جاتا ہے کہ نکولس مادورو فورٹ ٹیونا کے اندر ایک زیرِ زمین محفوظ پناہ گاہ میں مقیم تھے جسے "کاسا دی لوس پینوس" یا صنوبر کا گھر کہا جاتا ہے۔

متعدد ذرائع کے مطابق جن میں سابق وینزویلا اہلکار ایوان سیمونوفیس اور صحافی مایپورٹ بیٹیت شامل ہیں مادورو اپنی راتیں اسی محفوظ پناہ گاہ میں گزارتے تھے جو فورتی تیونا کے علاقے گواکایبورو میں واقع ہے۔

کہا جاتا ہے کہ یہ پناہ گاہ سرنگوں کے ذریعے فوجی کمپلیکس کے دیگر حصوں سے منسلک ہے اور یہاں سخت سکیورٹی تعینات رہتی ہے حتیٰ کہ بعض اطلاعات کے مطابق کیوبا کی سکیورٹی فورسز بھی اس کی حفاظت پر مامور تھیں جیسا کہ اس سے قبل اخبار وانگارڈیا نے رپورٹ کیا تھا۔

واضح رہے کہ صدارتی محل جسے میر افلورئیس پیلس کہا جاتا ہے اسی فوجی کمپلیکس کے قریب واقع ہے۔ تاہم مادورو درحقیقت فورتی تیونا میں موجود اسی انتہائی محفوظ زیرِ زمین پناہ گاہ میں قیام پذیر تھے۔

دوسری جانب وینزویلا کی نائب صدر ڈیلسے رودریگیز نے سرکاری ٹیلی وژن کو بتایا کہ امریکی حملوں میں آج کے اوائل میں متعدد وینزویلا فوجی اور شہری ہلاک ہوئے۔

انہوں نے یہ بھی تصدیق کی کہ انہیں صدر مادورو اور ان کی اہلیہ کے ٹھکانے کا علم نہیں اور نہ ہی یہ معلوم ہے کہ وہ زندہ ہیں یا نہیں۔

اسی دوران وینزویلا کے وزیر خارجہ ایوان خیل نے ٹیلی گرام پر اعلان کیا کہ ان کے ملک نے اقوام متحدہ کی سلامتی کونسل کا ہنگامی اجلاس بلانے کی درخواست کی ہے تاکہ بین الاقوامی قانون کے احترام کو یقینی بنایا جا سکے اور امریکہ کی جانب سے کی گئی مجرمانہ جارحیت کا سامنا کیا جا سکے۔

یاد رہے کہ امریکہ کا یہ اچانک اقدام واشنگٹن اور کراکس کے درمیان کئی ماہ سے جاری کشیدگی کے بعد سامنے آیا ہے۔ امریکی افواج نے بار ہا ایسے جہازوں کو نشانہ بنانے کا اعلان کیا جن پر منشیات اسمگلنگ کا شبہ تھا۔

اس کے ساتھ ساتھ امریکہ نے بحیرہ کیریبین میں اپنی عسکری موجودگی میں نمایاں اضافہ کیا اور یو ایس ایس جیرالڈ آر فورڈ طیارہ بردار بحری جہاز دیگر جنگی جہازوں جدید لڑاکا طیاروں اور طویل فاصلے تک مار کرنے والے بمبار طیارے بھی تعینات کیے۔