مصر نے حج ویزے کے حصول کے لیے میڈیکل سرٹیفکیٹ لازمی قرار دیا

مصری وزارتِ سیاحت نے اس بات پر سخت زور دیا ہے کہ سیاحتی حج پر جانے والے تمام عازمین کے لیے صحت کا سرٹیفکیٹ حاصل کرنا نہایت ضروری ہے جو سیاحتی حج ویزا کے اجرا کا بنیادی اور ناگزیر تقاضا ہوگا اور اسی کی بنیاد پر سعودی عرب جا کر فریضہ حج ادا کیا جا سکے گا۔

وزارت نے پیر کے روز جاری بیان میں کہا کہ اس سرٹیفکیٹ کے حصول کی مکمل پابندی فریضہ حج کی ادائیگی کی اجازت کے لیے بنیادی شرط ہے۔ یہ ضوابط مصری وزیر سیاحت شریف فتحی کی منظوری سے طے کیے گئے ہیں اور سعودی عرب کے متعلقہ اداروں کی جانب سے جاری کردہ ہدایات سے ہم آہنگ ہیں۔

ادھر وزارت کی معاون برائے امورِ سیاحتی کمپنیاں اور حج و عمرہ کی اعلیٰ کمیٹی کی سربراہ سامیہ سامی نے وضاحت کی کہ وزارتِ صحت مصر سے منظور شدہ ہسپتالوں سے جاری کردہ صحت کی استطاعت کا سرٹیفکیٹ پیش کیے بغیر ویزا سے متعلق کسی بھی مرحلے کی تکمیل نہیں کی جائے گی۔

انہوں نے کہا کہ یہ اقدام ایک جامع نظام کا حصہ ہے جس کا مقصد روانگی سے واپسی تک حجاج کی صحت اور سلامتی کو یقینی بنانا ہے۔ اس سلسلے میں سعودی عرب کے ہم منصب اداروں اور حج سے متعلق وزارتی کمیٹی کے ایگزیکٹو نظام کے ساتھ مکمل رابطہ رکھا جا رہا ہے تاکہ مناسک محفوظ اور منظم ماحول میں ادا کیے جا سکیں۔

سامیہ سامی نے مزید بتایا کہ ٹریول کمپنیوں اور ایجنسیوں کے چیمبر کے ساتھ رابطہ کر کے انہیں اس بات کا پابند بنایا گیا ہے کہ وہ کسی بھی کارروائی سے قبل عازمین کے پاس یہ سرٹیفکیٹ موجود ہونے کی تصدیق کریں۔ انہوں نے واضح کیا کہ سعودی پلیٹ فارم نسک مسار کے ذریعے بھی اس سرٹیفکیٹ کی منظوری ویزا کے اجرا کے لیے لازمی شرط ہوگی۔

انہوں نے عازمین کو ہدایت کی کہ سفر کے وقت یہ سرٹیفکیٹ اپنے ہمراہ رکھیں کیونکہ مملکت کے تمام فضائی اور زمینی داخلی راستوں پر اس کی جانچ اور تصدیق کی جائے گی۔

مصری وزارتِ سیاحت نے چند روز قبل اعلان کیا تھا کہ جدہ میں مصری وزارتِ سیاحت اور سعودی وزارتِ حج کے درمیان مشترکہ رابطہ کمیٹی کا پہلا اجلاس منعقد ہوا ہے۔ ان اجلاسوں میں ایک بڑی مشترکہ آگاہی مہم کے خدوخال طے کیے گئے جس کا ہدف مصری عمرہ زائرین اور سیاحتی حج کے عازمین ہیں۔

اس مہم کا مقصد مصر سے روانگی سے قبل تنظیمی طریقہ کار سے متعلق آگاہی بڑھانا ہے اور ہدایات کو ڈیجیٹل پلیٹ فارمز اور ذرائع ابلاغ کے ذریعے آسان پیغامات میں منتقل کرنا ہے۔ اس کے ساتھ حرمین شریفین میں بہترین طرزِ عمل اور تفویج کے نظام سے بھی آگاہ کیا جائے گا تاکہ نقل و حرکت میں روانی برقرار رہے۔

یہ اقدامات گذشتہ حج سیزن کے بعد طے پانے والے پروٹوکولز کو مزید بہتر بنانے کے لیے کیے جا رہے ہیں تاکہ حجاج کے ہجوم سے بچا جا سکے اور جامع طبی تحفظ فراہم کیا جا سکے۔

اس سے قبل مصری حکام غیر قانونی حج کے لیے سرگرم دلالوں اور بغیر لائسنس کمپنیوں کے خلاف چھاپے بھی مار چکے ہیں۔

گذشتہ بیانات میں العربیہ ڈاٹ نیٹ اور الحدث ڈاٹ نیٹ سے گفتگو کرتے ہوئے مصری وزیر سیاحت شریف فتحی نے کہا تھا کہ بغیر اجازت حج کرانے والے مافیا کے خلاف سعودی عرب کے ساتھ مکمل ہم آہنگی موجود ہے اور وزارت قانونی ذرائع کے ذریعے حجاج کے تحفظ کی پوری صلاحیت رکھتی ہے۔