جرمنی کے چانسلر کی حیثیت سے فریڈرک میرٹز نے پہلی بار جرمن فٹ بال لیگ (بنڈس لیگا) میں اپنی پسندیدہ ٹیم "بوروسیا ڈارٹمنڈ" کا میچ دیکھا۔ "بوروسیا ڈارٹمنڈ" نے ہفتے کے روز سینٹ پاؤلی کے ساتھ میچ کھیلا۔ جرمن نیوز ایجنسی کے مطابق میرٹز نے یہ میچ بوروسیا ڈارٹمنڈ کے سٹیڈیم میں اپنے پرانے دوست اور کلب کے صدر ہنز جوآخم واٹزکے کے ہمراہ دیکھا۔ بوروسیا ڈارٹمنڈ چانسلر کا پسندیدہ کلب ہے کیونکہ وہ اور واٹزکے دونوں ہی زاؤرلینڈ کے علاقے سے تعلق رکھتے ہیں۔ میرٹز 2014 تک اس کلب کی سپروائزری کونسل کے رکن بھی رہ چکے ہیں۔
بیکرز یونین کی تقریب
یہ میچ دیکھنے سے قبل میرٹز اور واٹزکے نے مغربی جرمنی کی بیکرز یونین کی ایک تقریب میں شرکت کی جہاں چانسلر کو "بڑا شٹوٹن کرل" ایوارڈ دیا گیا۔ یہ انسانی شکل کی میٹھی روٹی کا ماڈل ہے جس کی بلندی 1.2 میٹر اور وزن 10 کلوگرام ہے۔ واٹزکے نے اپنی تقریر میں کہا کہ میرٹز کا دستکاری کے پیشوں سے گہرا تعلق ہے اور وہ ان کی بہت قدر کرتے ہیں۔ انہوں نے مزید کہا کہ وہ چانسلر کو تقریباً 50 سال سے جانتے ہیں۔
واضح رہے یہ یونین 1988 سے اس بڑی جسامت کے بیکری آئٹم کو ان سیاسی اور معاشی شخصیات کو بطور اعزاز دیتی ہے جنہوں نے بیکری کے شعبے یا عمومی دستکاری کے پیشوں کے لیے نمایاں خدمات انجام دی ہوں۔ اسے مغربی جرمنی کی بیکرز یونین کا سب سے اعلیٰ ایوارڈ سمجھا جاتا ہے۔
