نائجیریا میں ڈاکوؤں کے حملے میں 30 افراد ہلاک

ذرائع نے اے ایف پی کو بتایا کہ نائیجیریا کی وسطی ریاست بینو جو طویل عرصے سے فرقہ وارانہ جھڑپوں کا شکار ہے، اس کے دو ہمسایہ قصبات میں چند دنوں کے دوران ہونے والے دو حملوں میں 30 افراد ہلاک ہو گئے۔

مقامی حکومتی اہلکار آئی بی اینڈریو نے اے ایف پی کو بتایا کہ کواندے کے ایک گاؤں انواسے میں مسلح ڈاکوؤں نے جمعہ کی دوپہر کم از کم 13 تاجروں کو ہلاک کر دیا۔

انہوں نے کہا کہ حملہ آوروں نے بازار میں حملہ کیا اور لوگوں پر اندھا دھند فائرنگ کی۔

"حملے سے تاجر اور رہائشی صدمے سے دوچار ہو گئے، املاک تباہ ہو گئیں اور خاندان اپنے لاپتہ پیاروں کی تلاش کر رہے تھے۔"

دو رہائشیوں اور مقامی میڈیا کے مطابق منگل کو مسلح افراد نے قریبی بازار پر حملہ کیا تھا جس میں ایک پولیس افسر سمیت 17 افراد ہلاک ہو گئے۔

اس خطے میں حالیہ مہینوں میں تشدد میں اضافہ دیکھنے میں آیا ہے جو مسلم نسلی فولانی چرواہوں اور بنیادی طور پر عیسائی کسانوں کے درمیان زمین اور وسائل کے کنٹرول پر ہوا ہے۔

عموماً فرقہ وارانہ تصادم کے طور پر پیش کی جانے والی بدامنی اگرچہ زمینی دشمنیوں کی پیچیدہ حرکیات سے پیدا ہوتی ہے جسے ماحولیاتی تبدیلیوں، چھوٹے ہتھیاروں کے پھیلاؤ اور ریاست نائجیریا کی طرف سے پائیدار ردِ عمل کی کمی نے مزید خراب کر دیا ہے۔