ٹرمپ کی وڈیو... جس میں ایران جنگ، پوپ اور ایک ڈلیوری خاتون کا تذکرہ یکجا

وائٹ ہاؤس میں اس وقت ایک عجیب و غریب منظر دیکھنے میں آیا جب صدر ڈونلڈ ٹرمپ نے "میکڈونلڈز" سے آرڈر کیا گیا اپنا پسندیدہ فاسٹ فوڈ خود وصول کیا اور پھر ایک پریس کانفرنس کی جس میں ایران کے ساتھ جنگ، پوپ لیون چہارم پر تنقید اور اپنی ایک متنازع تصویر پر گفتگو کی۔

صدر ٹرمپ نے ٹِپ (بخشش) پر ٹیکس ختم کرنے کی اپنی پالیسی کو فروغ دینے کے لیے خود باہر نکل کر ڈیلیوری لینے والی خاتون شارون سیمنز سے ہیمبرگر وصول کیے۔ اس موقع پر انہوں نے مزاحاً کہا کہ یہ کوئی پہلے سے طے شدہ منظر نہیں لگ رہا۔ انہوں نے دعویٰ کیا کہ ارکنساس سے تعلق رکھنے والی اس خاتون نے ان کی پالیسی کی بدولت رواں سال 11 ہزار ڈالر بچائے ہیں۔

بات چیت کے دوران جب ایک صحافی نے ان سے 'ٹروتھ سوشل' پر شیئر کی گئی اس تصویر کے بارے میں پوچھا جس میں انہیں مبینہ طور پر مسیح کے روپ میں دکھایا گیا ہے، تو ٹرمپ نے جواب دیا کہ انہوں نے تصویر شیئر ضرور کی ہے لیکن انہیں لگا کہ وہ ڈاکٹر کے لباس میں ہیں اور اس کا تعلق ریڈ کراس سے ہے، کیونکہ وہ لوگوں کا بہت علاج کرتے ہیں۔

پھر گفتگو کا رخ ایران کے ساتھ جاری جنگ کی طرف مڑ گیا۔ ایرانی بندرگاہوں کے امریکی محاصرے کے نفاذ کے بعد ٹرمپ نے دعویٰ کیا کہ ایرانی نمائندوں نے واشنگٹن سے رابطہ کیا ہے اور وہ "شدت" سے معاہدہ کرنے کے خواہش مند ہیں۔

پوپ لیون چہارم کے حوالے سے پوچھے گئے سوال پر ٹرمپ نے معذرت کرنے سے صاف انکار کر دیا۔ پوپ نے ایران کے خلاف جنگ میں تشدد ختم کرنے کی اپیل کی تھی جس پر تنقید کرتے ہوئے ٹرمپ نے کہا کہ پوپ غلطی پر ہیں اور ان کا موقف جرائم اور دیگر معاملات پر بہت کمزور رہا ہے۔ انہوں نے واضح کیا کہ ایران کو ایٹمی ہتھیار رکھنے کی اجازت نہیں دی جا سکتی۔

آخر میں ٹرمپ نے ٹرانس جینڈرز کی خواتین کے کھیلوں میں شرکت پر پابندی جیسے اپنے پسندیدہ موضوع پر بات کی، تاہم ڈیلیوری خاتون نے اس پر رائے دینے سے گریز کیا۔ پریس کانفرنس کے اختتام پر جب صحافیوں نے وائٹ ہاؤس کے ملازمین کی جانب سے ٹپس دینے کے بارے میں پوچھا تو ٹرمپ نے جیب سے 100 ڈالر کا نوٹ نکال کر ڈیلیوری خاتون کو دیتے ہوئے کہا کہ آپ لوگوں نے مجھے اچھا یاد دلایا۔