سعودی ولی عہد اور وزیر اعظم شہزادہ محمد بن سلمان کو آج جاپانی خاتون وزیراعظم سانائی تاکایچی کی ٹیلیفون کال موصول ہوئی۔ اس دوران دونوں ممالک کے درمیان دو طرفہ تعلقات اور مختلف شعبوں میں ان کی مضبوطی کے طریقوں پر تبادلہ خیال کیا گیا۔
دونوں رہنماؤں نے موجودہ تعاون کے شعبوں اور انہیں ترقی دینے کے مواقع کا جائزہ لیا، جو سعودی عرب اور جاپان کے درمیان تزویراتی شراکت داری کی مضبوطی اور مشترکہ تعاون کے افق کو وسعت دینے کی خواہش کی عکاسی کرتا ہے۔
رابطے کے دوران خطے کی تازہ ترین صورت حال، علاقائی و بین الاقوامی سطح پر اس کے سکیورٹی اور معاشی اثرات کے ساتھ ساتھ کشیدگی میں کمی اور امن و استحکام کے فروغ کے لیے کی جانے والی کوششوں پر بھی بات چیت کی گئی۔
فریقین نے بحری جہاز رانی کی سکیورٹی کو یقینی بنانے کی اہمیت اور عالمی معیشت و سپلائی چین پر اس کے اثرات پر بھی تبادلہ خیال کیا، جس میں خطے کو درپیش موجودہ چیلنجوں کے تناظر میں اہم سامان کی فراہمی پر پڑنے والے اثرات شامل ہیں۔
