امریکی فوج کا بحیرہ کیریبین میں ہدفی حملہ، دو ہلاکتیں

امریکی فوج نے کہا ہے کہ اس نے بحیرہ کیریبین کے علاقے میں ایک جہاز کو نشانہ بنایا، جس کے نتیجے میں دو افراد ہلاک ہو گئے۔

فوج کے مطابق ہدف بنایا گیا جہاز ''دہشت گرد تنظیموں'' کے زیرِ انتظام تھا، تاہم ان تنظیموں کی شناخت ظاہر نہیں کی گئی۔

جنوبی کمانڈ نے بتایا کہ اس کارروائی میں ان کے کسی اہلکار کو نقصان نہیں پہنچا۔ ہلاک ہونے والوں کو ''منشیات کی تجارت میں ملوث دہشت گرد عناصر ''قرار دیا گیا ہے، لیکن مزید تفصیلات فراہم نہیں کی گئیں۔

انسانی حقوق کی تنظیمیں ان کارروائیوں پر اعتراض کرتی ہیں اور انہیں ''عدالتی کارروائی کے بغیر قتل'' قرار دیتی ہیں۔

دوسری جانب امریکی صدر ڈونلڈ ٹرمپ کی انتظامیہ کا کہنا ہے کہ یہ کارروائیاں منشیات کی اسمگلنگ میں ملوث دہشت گردوں کو نشانہ بنانے کے لیے کی جا رہی ہیں۔