بدسلوکی کے الزامات کی بنا پر بین الاقوامی فوجداری عدالت کے پراسیکیوٹر عہدے سے معطل

بین الاقوامی فوجداری عدالت کے پراسیکیوٹر کریم خان کو پیر کی شب دیر گئے بڑھتے ہوئے دباؤ کے بعد ان کے عہدے سے معطل کر دیا گیا ہے۔ عدالت کی نگران باڈی نے ان کے خلاف تادیبی کارروائی کا آغاز کر دیا ہے۔

دو سال سے زائد عرصے سے جاری اس متنازعہ معاملے میں کریم خان کو اپنی ایک معاون کے ساتھ بدسلوکی کے الزامات کا سامنا ہے۔ انہوں نے کسی بھی قسم کی بدسلوکی کے ارتکاب کی سختی سے تردید کی ہے۔

برطانوی وکیل کے مستقبل کا حتمی فیصلہ اب "اسمبلی آف سٹیٹس پارٹیز" کے پاس ہے جو بین الاقوامی فوجداری عدالت کی نگران باڈی ہے۔ یہ باڈی ایک خصوصی اجلاس منعقد کرے گی تاکہ یہ طے کیا جا سکے کہ آیا کریم خان بین الاقوامی عدالت میں اپنے عہدے پر برقرار رہ سکیں گے یا نہیں۔

اسمبلی آف سٹیٹس پارٹیز کے دفتر نے پیر کو ایک بیان میں کہا کہ اس کا فیصلہ اقوام متحدہ کے دفتر برائے داخلی نگرانی کی خدمات کی تحقیقاتی رپورٹ، بنیادی شواہد، قانونی ماہرین کی خصوصی کمیٹی کے مشورے اور تحریری دستاویزات پر مبنی ہے۔

خبر رساں ادارے ایسوسی ایٹڈ پریس کی جانب سے دیکھی گئی رپورٹ کی ایک کاپی کے مطابق اقوام متحدہ کی تحقیقات میں اس بات کے شواہد ملے ہیں کہ کریم خان نے اپنے دفتر، اپنی رہائش گاہ اور ایک سرکاری مشن کے دوران معاون کے ساتھ غیر رضامندانہ جنسی رابطہ کیا۔ تاہم ایگزیکٹو کمیٹی کی جانب سے نتائج کے قانونی جائزے کے لیے منتخب کردہ تین ججوں پر مشتمل کمیٹی نے یہ رائے دی کہ تحقیقات حتمی نتائج تک پہنچنے کے لیے کافی نہیں تھیں۔

کریم خان سنہ 2025ء میں مئی کے مہینے میں تحقیقات کے نتائج آنے تک اپنے فرائض سے عارضی طور پر دستبردار ہو گئے تھے۔ یہ اقدامات بین الاقوامی فوجداری عدالت کی تاریخ میں غیر معمولی حیثیت رکھتے ہیں جس کی وجہ سے اسمبلی آف سٹیٹس پارٹیز کو اس کیس سے نمٹنے کے لیے بارہا نئے قواعد و ضوابط وضع کرنا پڑے ہیں۔