عمان کے ساحل کے قریب بحری جہاز میں لگی آگ کے بعد آبنائے ہرمز بند

برطانوی بحری تجارتی آپریشنز کے ادارے نے مقامی حکام کے حوالے سے بتایا ہے کہ سلطنت عمان میں صحار کے شمال مشرق میں 21 ناٹیکل میل کی دوری پر موجود ایک مال بردار بحری جہاز کے انجن روم میں آج جمعرات کے روز اچانک آگ بھڑک اٹھی۔

برطانوی ادارے نے نیوز ایجنسی "رائیٹرز" کے مطابق مزید بتایا ہے کہ اس حادثے کے نتیجے میں اب تک کسی قسم کے ماحولیاتی نقصانات کی کوئی اطلاع موصول نہیں ہوئی ہے۔

دوسری جانب ایران میں قائم عسکری ہیڈکوارٹر "خاتم الانبیاء" نے امریکہ کی طرف سے ایران پر کیے جانے والے نئے فضائی حملوں کے ردعمل میں آبنائے ہرمز کو تیل کے ٹینکروں اور تجارتی جہازوں کی آمد و رفت کے لیے مکمل طور پر بند کرنے کا باضابطہ اعلان کر دیا ہے۔ ایرانی عسکری حکام کا کہنا ہے کہ اب اگر کسی بھی بحری جہاز نے یہاں سے گزرنے کی کوشش کی تو اس پر براہ راست فائرنگ کر دی جائے گی۔ غاصب صہیونی دشمن اور امریکہ کی طرف سے خطے میں مسلسل سفاکیت اور نسل کشی کی پالیسیوں کے باعث صورتحال انتہائی کشیدہ ہو چکی ہے۔

اس سنگین عسکری صورتحال اور ناکہ بندی کے باعث عالمی مارکیٹ میں خام تیل کی قیمتوں میں آج جمعرات کے روز لگ بھگ دو ڈالر فی بیرل کا نمایاں اضافہ دیکھنے میں آیا ہے۔ گرین وچ کے معیاری وقت کے مطابق صبح 04:09 بجے برینٹ خام تیل کے مستقبل کے سودے 1.70 ڈالر یعنی 1.83 فیصد اضافے کے ساتھ 94.80 ڈالر فی بیرل پر پہنچ گئے۔ اس کے ساتھ ہی امریکی خام تیل ویسٹ ٹیکساس انٹرمیڈیٹ کی قیمت بھی 1.92 ڈالر یعنی 2.13 فیصد کے اضافے کے ساتھ 91.95 ڈالر فی بیرل ہو گئی۔ یاد رہے کہ اس سے قبل اسی سیشن کے دوران امریکی خام تیل کے سودوں میں 3 ڈالر سے زائد کا بڑا اضافہ بھی ریکارڈ کیا گیا تھا۔