ایران مذاکرات کی طرف مائل ہو تو یورپ پابندیوں میں نرمی کے لیے تیار رہے : میلونی

اطالوی وزیر اعظم جورجیا میلونی نے کہا ہے کہ اگر ایران مذاکرات کی خواہش ظاہر کرے تو یورپ کو اس پر عائد پابندیوں میں نرمی کے لیے تیار رہنا چاہیے... اور اگر ایسا نہ ہو تو ان میں اضافہ کرنا چاہیے۔

میلونی نے یہ بات آج جمعرات کے روز پارلیمنٹ سے خطاب کرتے ہوئے کہی۔ اس موقع پر انھوں نے امریکہ اور ایران کے درمیان جنگ کا بھی ذکر کیا، کیونکہ آبنائے ہرمز میں جاری کشیدگی کی وجہ سے توانائی کی قیمتوں میں اضافہ ہوا ہے اور عالمی معیشت منفی طور پر متاثر ہوئی ہے۔

میلونی نے کہا کہ اگر تہران اپنے غلط راستے پر چلنا جاری رکھتا ہے، جہاز رانی کی آزادی کو خطرے میں ڈالتا ہے، حملے کرتا ہے، ملیشیا کی حمایت کرتا ہے اور اپنی بین الاقوامی ذمہ داریوں کی خلاف ورزی کرتا ہے... تو یورپی یونین کو نئے ہدف پر مبنی اقدامات کے ذریعے دباؤ بڑھانے کے لیے تیار رہنا چاہیے۔
روس یوکرین جنگ کے حوالے سے انہوں نے کہا کہ کئیف کے یورپی اتحادیوں کو جنگ ختم کرنے کے لیے ماسکو کے ساتھ بات چیت کے لیے ایک نمائندہ مقرر کرنا چاہیے۔ انھوں نے نشان دہی کی کہ ممالک کے چھوٹے گروہ پورے بلاک کی نمائندگی نہیں کر سکتے۔

برطانیہ، فرانس اور جرمنی پر مشتمل یورپی ٹرائیکا کے رہنماؤں نے اتوار کو یوکرین کے صدر ولودی میر زیلنسکی سے ملاقات کی اور کہا کہ وہ جنگ بندی تک پہنچنے کے لیے روس کے ساتھ بات چیت کرنے کی کئیف کی تجویز کی حمایت کرتے ہیں۔

میلونی نے کہا کہ یورپ کو تنازع روکنے کے لیے ماسکو کے ساتھ "رابطہ" کرنا چاہیے، لیکن کوئی محدود گروپ سب کی جانب سے "بات کرنے کا اختیار" نہیں رکھتا۔

یورپی یونین کے سربراہی اجلاس اور اگلے ہفتے جی سیون ممالک کے رہنماؤں کے اجلاس سے قبل پارلیمنٹ سے خطاب کرتے ہوئے انہوں نے مزید کہا کہ "میں نے ہمیشہ ایک با اثر شخصیت کے تعین کی ضرورت کی حمایت کی ہے، جسے تمام یورپی یونین کے رکن ممالک کا اعتماد اور اختیار حاصل ہو تاکہ وہ یورپ کی نمائندگی کر سکے۔"

میلونی نے مزید کہا کہ یوکرین میں امن قائم کرنے کی کوششوں کے لیے یورپ اور امریکہ کے درمیان مضبوط رابطہ کاری کی بھی ضرورت ہے۔ خاتون وزیر اعظم کے مطابق "یہ ایک چیلنج ہے جو ہمیشہ آسان نہیں ہوتا لیکن ضروری ہے۔"