ایران کے ساتھ معاہدہ جائزے کے لیے کانگریس کے سپرد کریں گے، اس کا متن شائع کریں گے

امریکہ کے صدر ڈونلڈ ٹرمپ نے آج منگل کے روز فرانس میں گروپ سات کے اجلاس کے دوران صحافیوں سے گفتگو کرتے ہوئے کہا کہ ایران کے ساتھ مفاہمت کی یاد داشت میں واضح طور پر درج ہے کہ ایران جوہری ہتھیار کا مالک نہیں بنے گا۔ انہوں نے یہ بھی اشارہ دیا کہ ایران کے ساتھ معاہدے کو جائزے کے لیے کانگریس کے سپرد کیا جائے گا۔

ٹرمپ نے مزید کہا کہ وہ توقع کرتے ہیں کہ ایران کے ساتھ معاہدے کا دوسرا مرحلہ تیزی سے آگے بڑھے گا۔ انھوں نے واضح کیا کہ ایران کے ساتھ معاہدے کو کانگریس کے پاس بھیجنے کا خیال انہیں پسند ہے۔

امریکی صدر نے اشارہ کیا کہ ایران کے ساتھ معاہدے کے حوالے سے ایک پریس کانفرنس منعقد کی جائے گی۔ انھوں نے اس بات پر زور دیا کہ ایران کے ساتھ معاہدے کا متن با ضابطہ طور پر شائع کیا جائے گا۔

ٹرمپ نے مزید کہا کہ ہم دو دنوں کے اندر میڈیا کے ذریعے ایران کے ساتھ مفاہمت کی یاد داشت پیش کریں گے۔

انہوں نے یہ بھی تصدیق کی کہ آبنائے ہرمز جمعہ تک مکمل طور پر کھلی رہے گی۔

ابھی تک یہ واضح نہیں ہے کہ عبوری معاہدے میں کیا شامل ہے، کیونکہ اسے ابھی مکمل طور پر شائع نہیں کیا گیا ہے۔

اس سے قبل ایران کے وزیر خارجہ عباس عراقچی نے منگل کے روز کہا کہ امریکہ اور ایران کے درمیان مفاہمت کی یاد داشت کا با ضابطہ آغاز آئندہ جمعے کو ہو گا۔ انہوں نے نشان دہی کی کہ جنگ کے خاتمے کا اعلان پہلے مرحلے کے اہم ترین معاملات میں سے ہے۔

عراقچی نے سرکاری ٹیلی ویژن پر نشر ہونے والی غیر ملکی سفارت کاروں کے ساتھ ایک ملاقات میں کہا کہ اس بات کا امکان ہے کہ ایران اور امریکہ کے درمیان حتمی معاہدے تک پہنچنے کے لیے مذاکرات کا نیا دور جمعہ کو شروع ہو گا۔

عراقچی نے مزید کہا کہ امریکہ اور ایران کے درمیان مذاکرات کا نیا دور سوئٹزرلینڈ میں شروع ہوگا۔ انہوں نے تصدیق کی کہ ہم امریکہ کے ساتھ مذاکرات کے آخری مرحلے میں جوہری معاملے پر بحث کریں گے۔

ایران کے وزیر خارجہ نے اشارہ کیا کہ لبنان پر کوئی بھی اسرائیلی حملہ یا لبنانی علاقوں پر قبضہ امریکہ کے ساتھ معاہدے کی خلاف ورزی تصور کیا جائے گا۔

عراقچی نے اشارہ کیا کہ ہمارے نقطہ نظر سے، اس یاد داشت کے دونوں فریق ایک طرف امریکہ اور اسرائیل اور دوسری طرف ایران اور حزب اللہ تنظیم ہیں۔ انہوں نے مزید کہا کہ یہ شاید یاد داشت کا سب سے اہم معاملہ ہے، جو لبنان سمیت تمام محاذوں پر جنگ کے فوری اور مستقل خاتمے کا اعلان ہے۔