ایران کے ساتھ معاہدہ منصفانہ ہے اور وہ جوہری ہتھیار کا مالک نہیں بنے گا : ٹرمپ

امریکہ کے صدر ڈونلڈ ٹرمپ نے تصدیق کی ہے کہ تہران اس معاہدے کے تحت جوہری ہتھیار کا مالک نہیں بنے گا جو اب دوسرے مرحلے میں داخل ہو رہا ہے۔
ڈونلڈ ٹرمپ نے گروپ سات کے سربراہی اجلاس کے ضمن میں آج منگل کے روز قطر کے امیر شیخ تمیم بن حمد آل ثانی کے ساتھ دو طرفہ ملاقات میں مزید کہا "اگر ایران نے جوہری ہتھیار حاصل کرنے کی کوشش کی تو جہنم اس پر کھل جائے گی"۔ انہوں نے اس بات پر زور دیا کہ اس بات کو یقینی بنانا کہ ایران کے پاس جوہری ہتھیار نہ ہوں، وہی چیز تھی جس نے انہیں مفاہمت کی یاد داشت پر دستخط کرنے پر آمادہ کیا۔

نیز امریکی صدر نے واضح کیا کہ ان کے لیے یہ اہم ہے کہ ایران کسی بھی صورت میں جوہری ہتھیار کا مالک نہ بنے۔

ٹرمپ نے بات جاری رکھتے ہوئے کہا کہ "ہمارے پاس ایران کے ساتھ ایک منصفانہ اور اچھا معاہدہ ہے لیکن ہم وہاں کوئی سرمایہ کاری نہیں کر رہے.. کل پھیلنے والی افواہیں ہنسی کا باعث ہیں۔ ہمیں مداخلت کرنے اور اقدامات اٹھانے کا حق حاصل ہے اگر میں یا کوئی اور ایسا چاہے، لیکن ہم کوئی سرمایہ کاری نہیں کر رہے۔ ایران میں سرمایہ کاری کرنے کی ہماری کوئی ذمہ داری نہیں ہے"۔ انہوں نے نشان دہی کی کہ خطے میں بحران کے حل کے لیے قطر کی ثالثی پر اس کے ساتھ کام کرنا ایک اہم اور مثبت عنصر تھا۔

لبنان کی صورتحال کے حوالے سے ٹرمپ نے اسرائیل کے وزیر اعظم بنیامین نیتن یاہو سے مطالبہ کیا کہ وہ ان کے الفاظ کے مطابق لبنان کے حوالے سے زیادہ ذمہ داری کا مظاہرہ کریں۔

نیتن یاہو کے ساتھ بہترین تعلقات کا حامل ہونے کی تصدیق کرنے کے باوجود امریکی صدر نے مزید کہا کہ انہوں نے بیروت پر حال ہی میں ہونے والے حملے پر اسرائیل کے سامنے اپنی ناراضگی کا اظہار کیا ہے۔

ٹرمپ نے اعلان کیا کہ انہوں نے تجویز دی ہے کہ اسرائیل کی بجائے شام،،، حزب اللہ سے نمٹنے کی ذمہ داری سنبھالے۔

انہوں نے کہا "اگر اسرائیل دوسروں کو ہلاک کیے بغیر (لبنان میں) مشن انجام نہیں دے سکتا، تو شام کو یہ کام کرنا چاہیے"۔

اس کے علاوہ ٹرمپ نے شام کے صدر احمد الشرع کی تعریف کرتے ہوئے کہا کہ الشرع شان دار ہیں کیونکہ انہوں نے شام کے تمام معاملات کو منظم کیا ہے۔