فوکس نیوز کے مطابق امریکی بحریہ نے آبنائے ہرمز میں جہاز رانی کی بحالی کی تیاری کے سلسلے میں بحری جہازوں کے لیے تازہ ترین ہدایات جاری کر دی ہیں۔
ادھر بحری انٹیلی جنس میں مہارت رکھنے والی کمپنی ونڈورڈ نے نشان دہی کی ہے کہ کم از کم 23 دیوہیکل آئل ٹینکرز اس وقت دور دراز کے علاقوں سے متحدہ عرب امارات کی بندرگاہوں خرفکان اور فجیرہ کی جانب بڑھ رہے ہیں تاکہ وہ وہاں موجود دیگر 60 ٹینکرز اور 550 سے زائد ایسے جہازوں میں شامل ہو سکیں جو علاقے میں لنگر انداز ہیں اور نقل و حرکت بحال ہونے کے منتظر ہیں۔
دوسری جانب میری ٹائم ٹریفک ٹریکنگ سائٹ ٹینکر ٹریکرز نے بدھ کے روز اطلاع دی کہ ایرانی آئل ٹینکرز نے تہران اور واشنگٹن کے درمیان جمعہ کو ہونے والے معاہدے سے قبل، ایرانی بندرگاہوں پر تقریباً دو ماہ سے عائد امریکی محاصرے کے علاقے کو عبور کر لیا ہے۔
سائٹ نے "ایکس" پلیٹ فارم پر کہا کہ نیشنل ایرانی آئل ٹینکر کمپنی کے دو دیو ہیکل آئل ٹینکرز، جن کے نام ڈیونا اور ہیرو 2 ہیں، نے امریکی بحریہ کے نافذ کردہ محاصرے کے دائرہ کار کو عبور کر لیا ہے اور وہ مجموعی طور پر 38 لاکھ بیرل ایرانی خام تیل لے کر جا رہے ہیں۔ بعد ازاں سائٹ نے تیسرے ایرانی آئل ٹینکر کے گزرنے کی بھی اطلاع دی۔
سائٹ نے نشان دہی کی کہ یہ دو ماہ میں ایرانی خام تیل کی پہلی برآمدات ہیں۔
تاہم شپنگ اور میری ٹائم سکیورٹی کے شعبوں میں موجود ذرائع کا کہنا ہے کہ اسٹریٹجک آبی گزرگاہ کو دوبارہ کھولنے کے معاہدے کے باوجود آبنائے ہرمز کے بارودی سرنگوں سے پاک ہونے کی ضمانت جہاز رانی کی نقل و حرکت کو معمول پر لانے میں ہفتوں تاخیر کا باعث بن سکتی ہے۔
پانچ مغربی میری ٹائم سکیورٹی ذرائع کے جائزوں سے پتہ چلتا ہے کہ روایتی مائن سویپرز اور جدید خود کار آبدوزوں کے ذریعے بارودی سرنگیں ہٹانے کا عمل 40 سے 50 دنوں تک جاری رہ سکتا ہے۔
ایرانی نائب وزیر خارجہ مجید تخت روانچی نے منگل کے روز اعلان کیا کہ امریکہ نے مشرق وسطیٰ میں جنگ ختم کرنے کے لیے دونوں ممالک کے درمیان معاہدے پر دستخط سے قبل، ایرانی بندرگاہوں پر دو ماہ سے جاری اپنا بحری محاصرہ اٹھا لیا ہے۔
حکومتی ویب سائٹ کے مطابق مجید تخت روانچی نے کہا کہ محاصرہ اٹھانا ایک ایسی چیز تھی جس پر ہم نے شروع سے ہی زور دیا تھا۔ یہ اب شروع ہو چکا ہے اور جمعہ کو سوئٹزرلینڈ کے وسط میں ہونے والے معاہدے پر با ضابطہ دستخط سے قبل محاصرہ اٹھا لیا گیا ہے۔
یہ سب ایسے وقت میں ہو رہا ہے جب ایرانی سرکاری میڈیا نے اطلاع دی ہے کہ امریکہ اور ایران کے درمیان ابتدائی معاہدے کے بعد کئی ایرانی جہازوں نے خلیج عمان میں امریکہ کی جانب سے نافذ کردہ میری ٹائم نو گو زون کو عبور کر لیا ہے۔
امریکہ اور ایران کے درمیان متوقع معاہدے کے مسودے سے تہران کے لیے وسیع اقتصادی اور مالی مراعات کے پیکج کا انکشاف ہوا ہے، جس میں تیل اور ایندھن کی فوری فروخت کی اجازت، 300 ارب ڈالر سے کم مالیت کا فنانسنگ اور ترقیاتی منصوبہ اور بعد میں منجمد ایرانی اثاثوں کی بحالی شامل ہے۔ اس کے بدلے ایران کو جوہری پروگرام اور آبنائے ہرمز میں جہاز رانی کی آزادی سے متعلق وعدے پورے کرنے ہوں گے۔
بلومبرگ ویب سائٹ کا کہنا ہے کہ اس نے معاہدے کے مسودے کی نیم حتمی کاپی دیکھی ہے۔ اس نے ذکر کیا کہ یہ دستاویز ان اقتصادی فوائد کی اب تک کی سب سے واضح تصویر پیش کرتی ہے جو ایران کو آبنائے ہرمز میں جہاز رانی پر پابندیاں ختم کرنے اور جوہری ہتھیار حاصل نہ کرنے کے اپنے عزم کی تجدید کے بدلے مل سکتے ہیں۔
دونوں ممالک جمعہ کو سوئٹزرلینڈ میں با ضابطہ طور پر معاہدے پر دستخط کریں گے، جو جنگ کے خاتمے اور ایرانی جوہری پروگرام پر نئی پابندیاں عائد کرنے کے لیے حتمی معاہدے تک پہنچنے کے مقصد سے 60 روزہ مذاکرات کے دور کی راہ ہموار کرے گا۔
