لوکاشینکو کے بیان پر احتجاج، اسرائیل نے بیلاروس کے سفیر کو طلب کر لیا

اسرائیل نے اپنے ہاں تعینات بیلاروس کے سفیر کو بیلاروس کے صدر الیگزینڈر لوکاشینکو کے "العربیہ انگلش" کو دیے گئے اس بیان کے بعد طلب کر لیا جس میں انہوں نے کہا تھا کہ اسرائیل غزہ میں ہولوکاسٹ کا ارتکاب کر رہا ہے۔

"العربیہ انگلش" کے ساتھ اپنی گفتگو میں لوکاشینکو نے کہا کہ اسرائیل نے غزہ میں ہولوکاسٹ کیا ہے، اس لیے اسرائیل کو زیادہ محتاط رہنا چاہیے، غزہ پر بمباری کی وجہ سے دنیا میں اس کی ساکھ پہلے ہی خراب ہے۔ انہوں نے اس معاملے کو نسل کشی قرار دیا۔

بیلاروس کے صدر نے سوال اٹھایا کہ ہم اس ہولوکاسٹ کے بارے میں کیوں بات کرتے ہیں جس کا شکار اسرائیلی ہوئے جبکہ وہ خود اتنے سارے لوگوں کو قتل کر چکے ہیں؟ غزہ کی پٹی میں بنیادی طور پر خواتین اور بچے مارے گئے ہیں، اسے زمین کے اوپر سے مٹا دیا گیا ہے۔

انہوں نے مزید کہا کہ وہ اس زمین پر ایک ریزورٹ بنانے کی کوشش کر رہے ہیں جہاں یہ لوگ مارے گئے ہیں، اس لیے ہم کہتے ہیں کہ اسرائیل کو اپنے مستقبل کے بارے میں سوچنا شروع کر دینا چاہیے کیونکہ اس کے بغیر جوہری ہتھیار بھی کسی کام کے نہیں ہوں گے۔