برطانیہ کے شاہی محل کے ایک ذریعے نے جمعہ کو بتایا کہ شاہ چارلس اور ان کی اہلیہ ملکہ کمیلا نے شاہی رہائش گاہ ہائیگروو (مغربی انگلینڈ) میں شہزادہ ہیری، ان کی اہلیہ میگھن اور ان کے دونوں بچوں کی میزبانی کی۔
یہ 2022 کے بعد پہلا موقع ہے جب شاہ چارلس نے اپنے پوتے پوتی آرچی (7 سال) اور لیلیبت (5 سال) سے ملاقات کی ہے۔
شہزادہ ہیری اپنے والد شاہ چارلس اور بڑے بھائی شہزادہ ولیم کے ساتھ کھلے اختلافات کے بعد اب برطانیہ سال میں صرف ایک یا دو بار ہی آتے ہیں۔
شاہی ذریعے نے اس ملاقات کو ایک نجی خاندانی موقع قرار دیا اور کہا کہ اس کی کوئی تصاویر، ویڈیوز یا مزید تفصیلات جاری نہیں کی جائیں گی۔
رپورٹ کے مطابق ہیری کی آمد سے قبل سیکیورٹی انتظامات، قیام کی جگہ اور برطانوی اخبارات کے خلاف دائر رازداری کے ایک بڑے مقدمے کے فیصلے پر ان کے اور بکنگھم پیلس کے درمیان اختلافات نظر آئے تھے۔
77 سالہ شاہ چارلس کینسر کے علاج سے گزر رہے تھے، جس کے باعث انہیں اپنے پوتے پوتی کی پیدائش کے بعد ان سے ملاقات کے بہت کم مواقع ملے۔
ہیری نے گزشتہ سال کہا تھا کہ وہ اپنے خاندان سے صلح کرنا چاہتے ہیں کیونکہ انہیں معلوم نہیں کہ ان کے والد کے پاس کتنا وقت باقی ہے۔
دوسری جانب ہیری اس ہفتے ڈیلی میل اخبار کی ناشر کمپنی کے خلاف دائر رازداری کے مقدمے میں بھی ہار گئے۔ شہزادہ ہیری کے مطابق ان کے والد نے اس مقدمے کو ''خودکشی کی مہم'' قرار دیا تھا۔
جمعہ کو والد اور بیٹے کے درمیان ہونے والی یہ ملاقات ستمبر کے بعد پہلی براہِ راست ملاقات تھی۔ہیری نے اپنی خواہش ظاہر کی تھی کہ وہ دورے کے ابتدائی حصے میں اپنے دونوں بچوں کو بھی ساتھ لائیں، تاہم خاندان اور حکومت کے درمیان پولیس سیکیورٹی انتظامات پر اتفاق نہ ہو سکا۔
گزشتہ سال ہیری سیکیورٹی انتظامات سے متعلق قانونی جنگ ہار گئے تھے، جسے انہوں نے اپنے والد کے ساتھ تعلقات خراب ہونے کی ایک بڑی وجہ قرار دیا تھا۔
برطانوی خبر رساں ادارے پریس ایسوسی ایشن اور دیگر میڈیا رپورٹس کے مطابق میگھن اور دونوں بچوں آرچی اور لیلیبت ایک غیر ظاہر کردہ یورپی مقام سے برطانیہ پہنچے۔
شہزادہ ہیری پیر کے روز برطانیہ پہنچے تھے تاکہ 2014 میں شروع کیے گئے سابق فوجیوں کے لیے ان وکٹَس گیمز کے آئندہ ایڈیشن کی الٹی گنتی کا آغاز کر سکیں۔
آرچی اور لیلیبت کی اپنے دادا شاہ چارلس سے آخری ذاتی ملاقات ملکہ الزبتھ دوم کی 2022 میں پلاٹینم جوبلی تقریبات کے دوران ہوئی تھی۔
ہیری اور میگھن نے 2020 میں برطانیہ چھوڑ دیا تھا، جب ہیری نے شاہی خاندان میں اپنے کردار سے دستبرداری اختیار کی اور شمالی امریکا منتقل ہو گئے، جس کے بعد ان کے خاندان کے ساتھ اختلافات پیدا ہوئے۔
