فضائی حملے میں حماس تنظیم کی ایلیٹ یونٹ کے دو کمانڈروں کو ہلاک کر دیا : اسرائیلی فوج

اسرائیلی فوج نے آج بدھ کے روز اعلان کیا ہے کہ حماس تنظیم کے ایلیٹ یونٹ کے دو کمانڈروں کو ایک اسرائیلی فضائی حملے میں ہلاک کر دیا گیا ہے۔
فوج نے وضاحت کی کہ یہ عناصر حالیہ عرصے میں منصوبوں کو آگے بڑھانے اور انہیں عملی جامہ پہنانے کی کوشش کے لیے اکٹھے ہوئے تھے اور انہیں اس خطرے کو ختم کرنے کے لیے ہلاک کیا گیا۔

اسی تناظر میں آج صبح سویرے غزہ کی پٹی کے وسطی شہر دیر البلح میں ایک رہائشی اپارٹمنٹ کو نشانہ بنانے والے اسرائیلی فضائی حملے میں ایک ہی خاندان کے 4 افراد ہلاک ہو گئے۔ ہلاک شدگان میں ایک بچی بھی شامل ہے، جبکہ ایک اور بچہ ملبے سے نکالے جانے کے بعد زندہ بچ گیا۔

جرمن خبر رساں ایجنسی کے مطابق فلسطینی طبی اور مقامی ذرائع نے اطلاع دی ہے کہ ایک ہیلی کاپٹر نے برکہ چوک کے قریب ابو قاسم خاندان کے گھر پر حملہ کیا، جس کے نتیجے میں عمارت میں بڑی تباہی ہوئی اور آگ بھڑک اٹھی۔

ایمبولینس اور سول ڈیفنس کی ٹیمیں جائے حادثہ پر پہنچ گئیں، جہاں انہوں نے آگ بجھانے اور لاشوں کو نکالنے کا کام کیا، جبکہ نشانہ بننے والے اپارٹمنٹ کے اندر آگ بدستور بھڑک رہی تھی۔

اسرائیلی فوج کی جانب سے اس واقعے پر کوئی فوری تبصرہ سامنے نہیں آیا ہے۔

یہ حملہ اکتوبر 2025 میں نافذ ہونے والے جنگ بندی کے معاہدے کے باوجود جاری کشیدگی کے تناظر میں ہوا ہے۔ سرکاری فلسطینی ذرائع کے مطابق اس وقت سے لے اب تک غزہ کی پٹی کے مختلف علاقوں میں اسرائیلی فضائی حملوں اور توپ خانے کی گولہ باری میں ایک ہزار سے زائد فلسطینی اپنی جانوں سے ہاتھ دھو چکے ہیں۔