ایک باخبر ایرانی سفارت کار نے انکشاف کیا ہے کہ تہران میں فیصلہ سازی کے حلقوں کے اندر تقسیم کی سطح بڑھ رہی ہے۔ ایک دھڑا امریکہ کے ساتھ مزید تصادم کی طرف زور دے رہا ہے، جبکہ دوسرا دھڑا محاذ آرائی جاری رکھنے کے معاشی اثرات سے خبردار کر رہا ہے۔ یہ صورتحال ایسے وقت میں ہے جب ایران کو عسکری دباؤ اور بڑھتی ہوئی پابندیوں کا سامنا ہے۔
’وال سٹریٹ جرنل‘ کی جانب سے شائع کردہ رپورٹ کے مطابق، مذکورہ سفارت کار، جن کی شناخت اخبار نے ظاہر نہیں کی، نے بتایا کہ ایران کے اندر ایک انتہا پسند دھڑا محاذ آرائی کو تیز کرنے اور آبنائے ہرمز پر کنٹرول حاصل کرنے کا مطالبہ کر رہا ہے، کیونکہ وہ اسے واشنگٹن کے مقابلے میں دباؤ کا اہم ترین کارڈ سمجھتے ہیں۔
اس کے برعکس سفارت کار نے نشاندہی کی کہ "اعتدال پسند " یا حقیقت پسند دھڑا اس بات سے خوفزدہ ہے کہ امریکی محاصرہ اور عسکری کشیدگی جاری رہنے سے معیشت مزید تباہ ہو جائے گی۔ یہ دھڑا ایسے سیاسی راستے کی تلاش کا حامی ہے جس سے ملک پر دباؤ کم ہو سکے۔
یہ جائزہ ایسے وقت میں سامنے آیا ہے جب امریکہ اور ایران کے درمیان شدید حملوں کا تبادلہ ہو رہا ہے، جبکہ واشنگٹن پابندیاں سخت کرنے اور ایرانی بندرگاہوں پر بحری ناکہ بندی کو دوبارہ نافذ کرنے کا سلسلہ جاری رکھے ہوئے ہے، جس سے ایرانی معیشت پر دباؤ بڑھ گیا ہے۔
بڑھتا ہوا معاشی دباؤ
وال سٹریٹ جرنل نے اس اندرونی بحث کو بگڑتی ہوئی معاشی صورتحال سے جوڑا ہے۔ اخبار کے مطابق سرکاری ایرانی اعدادوشمار کے مطابق جون میں سالانہ افراط زر کی شرح 88.6 فیصد تک پہنچ گئی ہے۔
اخبار نے مزید کہا کہ بین الاقوامی مالیاتی فنڈ (آئی ایم ایف) نے حالیہ کشیدگی کی لہر سے پہلے ہی رواں سال کے دوران ایرانی معیشت کے 5.4 فیصد تک سکڑ جانے کی پیش گوئی کی تھی، جس کے بارے میں امکان ہے کہ اگر موجودہ محاذ آرائی جاری رہی تو یہ صورتحال مزید خراب ہو سکتی ہے۔
اخبار نے معاشی تخمینوں کا حوالہ دیتے ہوئے بتایا کہ ایران کے سب سے زیادہ آمدنی والے صرف 3 فیصد خاندان ہی اب مکمل فوڈ باسکٹ خریدنے کے قابل رہ گئے ہیں، جو قوت خرید میں کمی اور روزمرہ زندگی پر بڑھتے ہوئے دباؤ کی واضح علامت ہے۔
اخبار کی جانب سے ایرانی قیادت میں اختلاف رائے کی رپورٹ کے باوجود ایرانی حکام نے باضابطہ طور پر امریکہ کے ساتھ بحران سے نمٹنے کے حوالے سے سیاسی یا عسکری دھڑوں کے درمیان اختلافات کا اعتراف نہیں کیا ہے نہ ہی رپورٹ میں سفارت کار سے منسوب کیے گئے بیانات پر کوئی سرکاری ردعمل جاری کیا گیا ہے۔
یہ رپورٹ ایسے وقت میں سامنے آئی ہے جب اس بات کے اشارے بڑھ رہے ہیں کہ کشیدگی کا تسلسل نہ صرف عسکری اور سکیورٹی چیلنجز پیدا کر رہا ہے، بلکہ یہ ایرانی معیشت کو بھی ایسے بڑھتے ہوئے دباؤ میں ڈال رہا ہے جو مستقبل کے مرحلے میں فیصلہ سازوں کے انتخاب پر اثر انداز ہو سکتے ہیں۔
