بیروت: ہوٹل میں خودکش بم دھماکا ،ایک شخص ہلاک

لبنان کے دارالحکومت بیروت میں ایک ہوٹل میں خودکش بم دھماکا ہوا ہے جس کے نتیجے میں فوری طور پر ایک شخص کی ہلاکت کی اطلاع ہے اور سکیورٹی فورسز کے متعدد اہلکار زخمی ہوگئے ہیں۔

العربیہ نیوز کے نمائندے کی اطلاع کے مطابق بیروت کے مغربی علاقے الروشة میں واقع دوروی ہوٹل کی چوتھی منزل میں دھماکا ہوا ہے۔اس وقت لبنان کی جنرل سکیورٹی فورس کے اہلکار وہاں مشتبہ افراد کی موجودگی کی اطلاع پر چھاپہ مار کارروائی کررہے تھے۔یہ ہوٹل سعودی سفارت خانے کی عمارت کے نزدیک واقع ہے۔

بم دھماکے میں چھاپہ مار کارروائی میں شریک متعدد سکیورٹی اہلکار زخمی ہوگئے ہیں اور انھوں نے تین مشتبہ افراد کو حراست میں لے لیا ہے۔مقامی میڈیا کی اطلاع کے مطابق بم دھماکے کے بعد فائرنگ کی آوازیں بھی سنی گئی ہیں اور بہت سے لوگ ہوٹل میں پھنسے ہوئے تھے۔

بیروت کے بین الاقوامی ہوائی اڈے سے شہر کے جنوبی حصے کی جانب جانے والی شاہراہ پر سکیورٹی اہلکاروں کی بھاری نفری تعینات تھی۔یہ علاقہ شیعہ جنگجو تنظیم حزب اللہ کا گڑھ سمجھا جاتا ہے۔دو روز قبل بیروت کے ایک نواحی علاقے میں خودکش بم دھماکا ہوا تھا جس میں جنرل سکیورٹی فورس کا ایک سارجنٹ مارا گیا تھا۔

واضح رہے کہ پڑوسی ملک شام میں گذشتہ سواتین سال سے جاری خانہ جنگی کے لبنان میں بھی نمایاں منفی اثرات مرتب ہوئے ہیں اور اس ملک میں اہل تشیع اور اہل سنت کے درمیان کشیدگی پائی جارہی ہے۔ حالیہ مہینوں کے دوران بیروت کے مختلف حصوں میں متعدد بم دھماکے ہوچکے ہیں اور تشدد کے ان واقعات کی وجہ سے اس چھوٹے ملک کی سیاحت کی صنعت بری طرح متاثر ہوئی ہے۔