وادی گولان میں اسرائیلی فضائی حملے میں 7 جنگجو ہلاک

شام کے علاقے وادی گولان میں اسرائیل کے ایک فضائی حملے میں کم سے کم سات جنگجو ہلاک ہوگئے۔ عبرانی ریڈیو کے مطابق یہ کارروائی جمعرات کی شام کی گئی۔

اسرائیلی ریڈیو کے مطابق فوج نے وادی گولان میں ایک کارروائی میں سات عسکریت پسند ہلاک کردیے۔ تاہم اس کارروائی کی تفصیلات بتانے والے ذرائع کی شناخت ظاہر نہیں کی گئی۔

ادھراسرائیلی فوج کی طرف سے جاری ایک بیان میں کہا گیا ہے کہ جنوبی وادی گولان میں ایک مسلح دہشت گرد گروپ کو نشانہ بنایا گیا تاہم یہ واضح نہیں کیا گیا کہ آیا کارروائی میں عسکریت پسندوں کا جانی نقصان ہوا ہے یا نہیں۔

انسانی حقوق کی صورت حال پرنظر رکھنے والے ادارے ’آبزر ویٹری‘ نے ایک بیان میں بتایا ہے کہ وادی گولان میں سرکاری فوج اور داعش کے جنگجوؤں کے درمیان جھڑپیں ہوئی ہیں۔

اسرائیلی فوج کا کہنا ہے کہ انہیں سرحدی علاقے سے ’اے کے 47‘ رائفل اور ایک بم بھی ملا ہے۔