یورپی ممالک نے اسرائیل کو فلسطینی گاؤں برباد کرنے کے حوالے سے خبردار کر دیا
یورپ کے بڑے ممالک کی جانب سے ایک نادر نوعیت کا مشترکہ بیان جاری ہوا ہے جس میں اسرائیل کو خبردار کیا گیا ہے کہ وہ مغربی کنارے میں واقع فلسطینی گاؤں خان الاحمر کو برباد کرنے سے باز رہے۔
پیر کے روز جاری بیان میں فرانس، جرمنی، اسپین اور برطانیہ کا کہنا ہے کہ اس گاؤں کا تزویراتی محل وقوع "مستقبل کی فلسطینی ریاست کے حصّوں کو باہم رکھنے" کے لیے اہم ہے۔
بیان کے مطابق گاؤں کے خاتمے اور نقل مکانی کے مقامی آبادی پر انتہائی خطرناک نتائج مرتّب ہوں گے۔
اسرائیل کا دعوی ہے کہ خان الاحمر غیر قانونی طور پر تعمیر کیا گیا تھا۔ اسرائیل نے گاؤں کی آبادی کو 12 کلو میٹر دُور مقام پر دوبارہ بسانے کی پیش کش کی ہے۔
مخالف حلقوں کا کہنا ہے کہ مذکورہ گاؤں کے خاتمے کا مقصد ایک اسرائیلی بستی قائم کرنے کے لیے جگہ حاصل کرنا ہے۔
اسرائیلی سپریم کورٹ نے گزشتہ ہفتے خان الاحمر گاؤں ختم کرنے کے خلاف اپیل مسترد کر دی تھی۔
