’’سعودی شہری ترکی میں اپنی سفری دستاویزات اور رقوم کی خصوصی حفاظت کریں‘‘

ترکی میں سعودی سفارت خانے نے اپنے شہریوں کو خبردار کیا ہے کہ ملک کے بعض علاقوں میں ان کے پاسپورٹس اور مالی رقوم کو چوری اور لوٹ مار کا نشانہ بنایا جا سکتا ہے۔

سفارت خانے کی جانب سے جاری بیان میں واضح کیا گیا ہے کہ بعض سعودی مرد اور خواتین شہریوں کو ترکی کے بعض علاقوں میں نا معلوم افراد کی جانب سے مذکورہ کارروائیوں کا نشانہ بنایا گیا ہے۔

سعودی سفارت خانے نے پاسپورٹس اور قیمتی ذاتی اشیاء کی خصوصی حفاظت پر زور دیا۔

بیان میں سعودی شہریوں کو باور کرایا گیا ہے کہ وہ بِھیڑ اور رَش کے مقامات سے دور رہیں اور ہنگامی صورت حال میں انقرہ میں سعودی سفارت خانے یا استنبول میں قونصل خانے سے رابطے میں ہر گز نہ ہچکچائیں۔