.

العُلا ایئرپورٹ سعودی عرب کے بین الاقوامی ہوائی اڈوں میں شامل

پہلی اشاعت: آخری اپ ڈیٹ:

سعودی شہری ہوابازی کی اتھارٹی نے جمعرات کے روز ایک فیصلے میں العُلا کے شہزادہ عبدالمجيد بن عبد العزيز ایئرپورٹ کو مملکت کے بین الاقوامی ہوائی اڈوں کی فہرست میں شامل کرنے کی منظوری دے دی۔ اس طرح مملکت کا پانچواں بڑا ہوائی اڈا بین الاقوامی پروازوں کا استقبال کر سکے گا۔ العُلا ہوائی اڈے کا رقبہ 24 لاکھ مربع میٹر ہے۔

اگست 2019ء سے العُلا کے بین الاقوامی ہوائی اڈے پر متعدد ترقیاتی منصوبے دیکھے جا رہے تھے۔ ان کا مقصد العُلا کو عالمی سطح پر ایک سیاحتی مقام تک پہنچانا اور مملکت کے پروگرام "ویژن 2030ء" کے مقررہ اہداف کی تکمیل ہے۔

ترقیاتی منصوبوں کی بدولت ہوائی اڈے پر مسافروں کی سالانہ گنجائش ایک لاکھ سے بڑھا کر چار لاکھ تک ہو گئی ہے۔ ہوائی اڈے پر ایک ہی وقت میں 15 تجارتی پروازوں کا استقبال کیا جا سکتا ہے۔

ہوائی اڈے پر جدید ٹیکنالوجی اور عالمی معیار کی خدمات کے حامل لاؤنج موجود ہیں۔

اس ہوائی اڈے کا ترقیاتی پروگرام العُلا ضلع کے لیے رائل اتھارٹی کی حکمت عملی کا ایک بنیادی عنصر ہے۔ اس حکمت عملی کا مقصد العُلا کو تاریخی ، ثقافتی ، سیاحتی اور قدرتی پہلوؤں کے حوالے سے ایک معروف عالمی مقام کا درجہ دینا ہے۔ سال 2035ء تک العُلا آنے والے افراد کی سالانہ تعداد 20 لاکھ اور سعودی عرب کی مجموعی مقامی پیداوار میں اس کی آمدنی کا حصہ 120 ارب ریال تک پہنچانے کا ہدف مقرر کیا گیا ہے۔