سعودی عرب کا برطانیہ،امریکہ اور شینگن کے مسافروں کے لیے فوری ای ویزا آپیشنز کا اعلان

سعودی عرب نے پیر کو برطانیہ، امریکہ، شینگن کے ویزا والے مسافروں اور ان ملکوں کے مستقل رہائشیوں کے لیے سفری پابندیوں میں نرمی کے اقدامات کے طور پر نئے فوری ای ویزا کے اختیارات کا اعلان کردیا۔ اب یہ مسافر وزارت خارجہ کی ویب سائٹ کے ذریعے فوری ای ویزا کے لیے درخواست دے سکتے ہیں۔ واضح رہے شینگن ایریا میں یورپی یونین کے 23 ملکوں سمیت 27 ممالک شامل ہوتے ہیں۔

ویزا کے تازہ ترین اقدامات 2030 تک سالانہ 100 ملین افراد کے سعودی عرب کے سفر کے ہدف تک پہنچنے کا ایک حصہ ہیں۔ سعودی عرب نے یہ ہدف ’’ ویژن 2030‘‘ کے تحت طے کیا ہے۔

سعودی پریس ایجنسی کے مطابق 2019 میں سیاحت کے لیے کھلنے کے بعد سے سعودی عرب عالمی سطح پر تیزی سے ترقی کرنے والی سیاحتی منڈیوں میں سے ایک بن گیا ہے۔ سال 2022 میں سعودی عرب کے دوروں یا سفر کی تعداد ریکارڈ 93.5 ملین تک پہنچ گئی تھی ۔

نیا فوری ای ویزا ان متعدد اقدامات میں شامل ہے جو ملک نے گزشتہ سال کے دوران مہمانوں کے تجربے کو بہتر بنانے کے لیے شروع کیے ہیں۔

سعودی عرب نے اس سے قبل امریکہ، برطانیہ اور شینگن ویزا رکھنے والوں کے ساتھ ساتھ برطانیہ، امریکہ اور یورپی یونین کے کسی بھی ملک کے مستقل باشندوں کو آمد پر ویزا فراہم کرنے کے ضابطے میں بھی توسیع کی ہے۔ اسی طرح ای ویزا کی اہلیت جی سی سی کے رہائشیوں کے لیے بھی بڑھا دی گئی ہے۔ اس سال کے شروع میں سعودی عرب نے نیا سٹاپ اوور ویزا شروع کرنے کا اعلان بھی کیا تھا۔