ترکیہ نے جمعرات کو اسرائیل پر الزام عائد کیا ہے کہ وہ غزہ جنگ کو لبنان تک وسعت دینے کی کوشش کر رہا ہے جس میں مہلک دھماکوں کی "خطرناک" لہر حزب اللہ کے مضبوط مراکز تک جا پہنچی۔
ترک وزیرِ خارجہ ہاکان فیدان نے سرکاری ٹی آر ٹی ٹیلی ویژن پر کہا، "خطے میں کشیدہ حالات تشویشناک ہیں۔ ہم دیکھتے ہیں کہ اسرائیل مرحلہ وار لبنان کی طرف اپنے حملے بڑھا رہا ہے۔"
لبنان کی وزارتِ صحت کے اعداد و شمار کے مطابق ان دھماکوں میں دو دنوں میں 32 افراد ہلاک ہوئے جن میں دو بچے بھی شامل ہیں جبکہ 3000 سے زیادہ زخمی ہوئے ہیں۔
اسرائیل نے اس بے مثال کارروائی پر کوئی تبصرہ نہیں کیا جس میں حزب اللہ کے کارکنان کے واکی ٹاکی اور پیجرز بازاروں، جنازوں اور سڑکوں پر دھماکے سے پھٹ گئے۔
تاہم اسرائیلی وزیرِ دفاع یوآو گیلنٹ نے لبنان کے ساتھ اسرائیل کی سرحد کا حوالہ دیتے ہوئے بدھ کو کہا: "توجہ کا مرکز شمال کی طرف ہو رہا ہے۔"
ترکیہ نے پیجر دھماکوں کا الزام اسرائیل پر عائد کیا۔
فیدان نے کہا، "ہم اس مقام پر پہنچ گئے ہیں جہاں اسرائیل کی کارروائیاں بےحد اشتعال انگیز ہوتی جا رہی ہیں اور بدلے میں ایران، حزب اللہ اور ان کے قریبی عناصر کے پاس جواب دینے کے سوا کوئی چارہ نہیں ہے۔"
ترک صدر رجب طیب ایردوآن نے بدھ کے روز لبنان کے وزیرِ اعظم نجیب میقاتی کو فون کر کے مہلک دھماکوں کی لہر پر تعزیت کا اظہار کیا۔
ایردوآن غزہ میں اسرائیل کی جارحیت کے سخت ناقد ہیں۔
'وسیع پیمانے پر'
فیدان وزیرِ خارجہ مقرر ہونے سے پہلے ترکیہ کی جاسوسی ایجنسی کے سربراہ تھے۔ انہوں نے وسیع پیمانے پر دھماکوں کے طریقۂ کار کے بارے میں کہا: "یہ وہ چیز ہے جسے انٹیلی جنس ادارے اکثر استعمال کرتے ہیں۔"
انہوں نے مزید کہا، "لیکن یہ ایک وسیع پیمانے پر تھا۔" انہوں نے خبردار کیا، اسرائیل کی مہم پورے خطے سے باہر پھیلنے کا خطرہ ہے۔
انہوں نے کہا، "اس وقت جبکہ ہم لبنان کے بارے میں سوچ رہے ہیں، وہاں ہمیشہ جنگ کا خطرہ رہتا ہے جس میں اردن، مصر اور پورا خطہ شامل ہو سکتا ہے۔"
انہوں نے پوچھا، "کیا اسرائیل مستقل امن چاہتا ہے یا وہ کلاسیکی جنگی طریقوں کو استعمال کرکے ہر اس چیز کو ختم کر دینا چاہتا ہے جس سے اسے خطرہ ہے؟"
انہوں نے مزید کہا، "اس وقت اسرائیل میں جنونی حکومت تمام خطرات کو ختم کر دینے کی حکمت عملی پر عمل پیرا ہے۔"
نیز انہوں نے کہا، "بین الاقوامی نظام کو اسے روکنے کی ضرورت ہے اس سے پہلے کہ بہت دیر ہو جائے۔ یہ دیوانگی نہ صرف فلسطینیوں کو نقصان پہنچاتی ہے بلکہ اسرائیلیوں کے مستقبل کے لیے بھی خطرہ ہے۔
فیدان جنہوں نے جنگ بندی کو آسان بنانے کے لیے ایک شدید سفارتی کوشش کی ہے، بدھ کے روز اردن میں غزہ کے بحران پر گفتگو کے لیے ایک اجلاس میں شریک ہوئے۔
