معاملات کے قابو سے باہر ہونے کے خطرات حقیقی ہیں: سعودی وزیر خارجہ

لبنان میں جاری اسرائیلی فوجی کارروائیوں کے تناظر میں سعودی وزیر خارجہ شہزادہ فیصل بن فرحان نے کشیدگی اور لڑائی کو روکنے اور سیاسی حل تلاش کرنے کی ضرورت پر زور دیتے ہوئے کہا کہ اس مسئلے کی بنیاد غزہ کی جنگ میں ہے۔

العربیہ سے گفتگو کرتے ہوئے شہزادہ فیصل بن فرحان نے کہا کہ معاملات کے قابو سے باہر ہونے کے خطرات حقیقی ہو چکے ہیں۔ غزہ کی پٹی میں جنگ بندی اور خطے میں امن کی طرف منتقلی کی ضرورت ہے۔ انہوں نے کہا دو ریاستی حل پر عمل درآمد کے لیے موثر کارروائی کا وقت آ گیا ہے۔

سعودی وزیر خارجہ شہزادہ فیصل بن فرحان نے فلسطینی ریاست کے قیام اور دو ریاستی حل کو عملی جامہ پہنانے کے لیے بین الاقوامی اتحاد کے قیام کا اعلان کرتے ہوئے کہا کہ اس اتحاد کا پہلا اجلاس ریاض میں ہوگا۔

انہوں نے نیویارک میں "غزہ کی صورتحال اور ایک منصفانہ اور جامع امن کے راستے کے طور پر دو ریاستی حل کا نفاذ " کے عنوان سے ایک وزارتی اجلاس کے دوران کہا کہ فلسطینی ریاست کے قیام کے لیے اتحاد ایک مشترکہ یورپی عرب کاوش ہے۔

انہوں نے کہا کہ عرب اور اسلامی ممالک اپنے یورپی شراکت داروں کے ساتھ مل کر دو ریاستی حل کو عملی جامہ پہنانے کے لیے بین الاقوامی اتحاد کے آغاز کا اعلان کرتے ہیں۔ مجھے آپ کو سعودی عرب میں ہونے والے پہلے اجلاس میں شرکت کی دعوت دیتے ہوئے خوشی ہو رہی ہے۔ آئیے امن کے حصول میں اپنا حصہ ڈالیں۔