شمالی غزہ میں انسداد پولیو مہم کا دوسرا مرحلہ شروع

اقوام متحدہ کے بچوں کے فنڈ (یونیسیف) کے ایک ترجمان نے کہا ہے کہ شمالی غزہ میں پولیو سے بچاؤ کے قطرے پلانے کی دوسری خوراک کا انتظام دوبارہ شروع ہو گیا ہے۔ ترجمان نے جرمن نیوز ایجنسی (DPA) کو دیے گئے ایک بیان میں وضاحت کی کہ اس مہم کو آسان بنانے کے لیے جس انسانی بنیادوں پر جنگ بندی پر اتفاق کیا گیا تھا وہ صرف غزہ شہر تک محدود تھا۔ اس وقت اس حوالے سے متنبہ کیا گیا تھا کہ صحت کے کارکنان شمالی غزہ میں دس سال سے کم عمر کے تقریباً 15,000 بچوں تک پہنچنے سے قاصر رہے ہیں۔

غزہ میں طبی ذرائع نے اطلاع دی ہے کہ ہزاروں باشندے ہفتہ کے روز اپنے بچوں کو قطرے پلانے کے لیے دوپہر تک شمالی غزہ میں قائم کیے گئے طبی مراکز میں لے کر آئے۔ یونیسیف کے مطابق شمالی غزہ میں تقریباً 119,000 بچوں کو پولیو کے قطرے پلانے کی دوسری خوراک دی جائے گی۔ ورلڈ ہیلتھ آرگنائزیشن نے گزشتہ اکتوبر میں کہا تھا کہ بڑے پیمانے پر نقل مکانی اور شمالی غزہ تک رسائی میں دشواری کی وجہ سے انسداد پولیو مہم کو ملتوی کیا گیا ہے۔

ویکسینیشن کی مہم گزشتہ ستمبر کی پہلی تاریخ کو شروع ہوئی تھی جب اگست میں عالمی ادارہ صحت کی جانب سے اس بات کی تصدیق کی گئی تھی کہ ٹائپ ٹو پولیو وائرس کی وجہ سے ایک شیر خوار بچہ جزوی طور پر مفلوج ہو گیا ہے۔ یہ 25 سالوں میں غزہ کی پٹی میں ریکارڈ ہونے والا پہلا کیس تھا۔ تنظیم نے کہا کہ مہم کے آخری مرحلے کا مقصد شمالی غزہ میں دس سال سے کم عمر کے تقریباً 119,000 بچوں کو 2 اورل پولیو ویکسین کی دوسری خوراک فراہم کرنا ہے۔