دمشق: ’’ جہاد موومنٹ ‘‘ کے مراکز پر حملہ کے بعد المزہ اور کفر سوسہ پر نئے حملے

دمشق میں دو دھماکوں کی آوازیں سنی گئیں۔ خاص طور پر المزہ اور کفر سوسہ کے علاقوں میں آوازیں سنی گئیں۔ دھماکے کی نوعیت کا ابھی تک پتہ نہیں چل سکا۔ شامی خبر ایجنسی نے تصدیق نہیں کی کہ آیا یہ اسرائیلی حملے تھے یا نہیں۔ اسرائیلی فوج کے پریس آفس نے اعلان کیا ہے کہ اسرائیلی فضائیہ نے شام لبنان سرحد پر متعدد اہداف پر حملے کئے۔

پریس آفس کے مطابق حملوں میں لبنان-شام کی سرحد پر شامی حکومت سے تعلق رکھنے والے سمگلنگ کے راستوں کو نشانہ بنایا گیا۔ اس کا مقصد شام سے لبنان میں حزب اللہ کو ہتھیاروں کی سمگلنگ میں رکاوٹ ڈالنا تھا۔

بیان میں وضاحت کی گئی ہے کہ سمگلنگ کے راستوں پر کیے گئے حملے وسیع تر کارروائیوں کا حصہ ہیں جن کا مقصد یونٹ 4400 کی صلاحیتوں کو کمزور کرنا ہے۔ یہ حزب اللہ کا ایک یونٹ ہے جو ایران سے شام کے راستے لبنان ہتھیاروں کی سمگلنگ کا ذمہ دار سمجھا جاتا ہے۔ ان ہتھیاروں کی ترسیل کا مقصد اسرائیل کے خلاف حملے کرنا ہوتا ہے۔ شام کے دارالحکومت دمشق کو اسرائیلی بمباری سے نشانہ بنانے کے بعد ذرائع نے دمشق میں تحریک جہاد کی مرکزی قیادت کے کم از کم 20 کارکنوں اور رہنماؤں کے مارے جانے کی تصدیق کی ہے۔ حملے میں شام میں جہاد موومنٹ کے متعدد دفاتر کو نشانہ بنایا گیا۔

جہاد موومنٹ نے ایک باضابطہ بیان میں اعلان کیا ہے کہ اس کے کئی رہنما اس مومنٹ کے ان اداروں کو نشانہ بنانے میں مارے گئے جو موومنٹ کے ارکان کو شہری خدمات فراہم کرتے ہیں۔ "جہاد موومنٹ " کے قریبی فلسطینی ذرائع نے تصدیق کی ہے کہ جس ہیڈ کوارٹر کو نشانہ بنایا گیا تھا اس میں دمشق میں جہاد موومنٹ کے عرب تعلقات کے عہدیدار رسمی ابو عیسیٰ کو ہلاک کر دیا گیا۔ ایک اور رہنما اور پولیٹیکل بیورو کے سابق رکن عبدالعزیز المیناوی کے حوالے سے معلومات واضح نہیں ہوسکیں۔ اسرائیلی حملے میں بڑے پیمانے پر تباہی کی وجہ سے عمارت زمین کے برابر ہوگئی ہے۔

ذرائع نے تصدیق کی ہے کہ دمشق میں المزہ کے علاقے میں نشانہ بنائے گئے ہیڈ کوارٹرز سے متاثرین کی لاشیں نکالنے کے لیے تلاشی کی کوششیں جاری ہیں ۔ اسرائیل اور حزب اللہ کے درمیان غزہ میں جنگ کے پس منظر میں سرحد پار سے بمباری کے ایک سال بعد 23 ستمبر سے کھلی محاذ آرائی جاری ہے۔

اسرائیل نے بھی برسوں سے شام میں ایران سے منسلک اہداف پر حملے کیے ہیں لیکن اس نے گزشتہ برس 7 اکتوبر کو حماس کی جانب سے اسرائیل پر کیے جانے والے حملے کے بعد سے ان حملوں میں شدت پیدا کر دی ہے۔