جنگ زدہ معیشت کے لیے بدترین دور گذر گیا ہے: اسرائیل کی حکومت پراعتماد

اسرائیل کی حکومت کو یقین ہے کہ غزہ اور لبنان میں جنگوں کی وجہ سے جو معیشت تناؤ کا شکار ہے، وہ لڑائی آسان ہو جانے کے ساتھ اگلے سال مضبوط ہو جائے گی۔

اسرائیلی وزارت خزانہ کے اعلیٰ معیشت دان شموئل ابرامزون نے منگل کو بلومبرگ ٹیلی ویژن کو بتایا، "ہم توقع کرتے ہیں کہ تنازعہ بتدریج ختم ہو جائے گا۔ ہم 2025 میں ایک مثبت سال کی توقع رکھتے ہیں۔"

حکومت اگلے سال مجموعی قومی پیداوار میں 4.3 فیصد اضافہ دیکھ رہی ہے جو 2024 کے صرف 0.4 فیصد کے تخمینے سے زیادہ ہے۔

ابرامزون نے یروشلم شہر سے بات کرتے ہوئے اکتوبر کے اوائل سے اسرائیل کے شیکل کی مضبوطی اور سٹاک مارکیٹ میں اضافے کے ساتھ ساتھ حکومت کے کریڈٹ ڈیفالٹ سویپ کے لیے قیمتوں میں کمی کا حوالہ دیا۔ اس عرصے میں اسرائیلی خودمختار مقامی کرنسی بانڈز کی پیداوار میں بھی کمی آئی۔

یہ بہت حد تک حزب اللہ کے خلاف اسرائیل کی فوجی کامیابیوں اور اس بات کی بڑھتی ہوئی امید پر منحصر ہے کہ لبنانی گروپ کے ساتھ جنگ بندی قریب ہے۔

ابرامزون نے کہا ، "اب بھی کافی غیر یقینی صورتِ حال ہے جسے حل کرنے کی ضرورت ہے۔" ایک معاشی بہتری "اس پر انحصار کرے گی کہ سکیورٹی کے محاذ پر چیزیں کس طریقے سے ختم ہوں گی۔"

انہوں نے کہا، وزیرِ اعظم بنجمن نیتن یاہو کی کابینہ کو یقین ہے کہ پارلیمنٹ اس کا 2025 کا بجٹ بڑی تبدیلیوں کی کوشش کیے بغیر منظور کر لے گی۔

انہوں نے کہا، "مذاکرات کے ساتھ پارلیمانی عمل ہمیشہ کچھ مشکل ہوتا ہے۔ آخرِ کار یہ ایک اتحادی پارلیمنٹ ہے جس پر کابینہ کا کافی مضبوط کنٹرول ہے۔"

اخراجات کے منصوبے میں اگلے سال مجموعی قومی پیداوار کے 4.4 فیصد کے مالیاتی خسارے کی پیش گوئی کی گئی ہے۔ یہ 2024 کے اعداد و شمار سے کم ہو گا جو جنگ سے متعلق اخراجات میں اضافے اور معیشت کے کئی شعبوں میں سست روی کے باعث شاید آٹھ فیصد کے قریب ختم ہو گا۔ 2025 کے منصوبے میں ٹیکس لگانے کے اقدامات اور اخراجات میں کچھ کٹوتیاں شامل ہیں جن کی کل تعداد 35 بلین شیکل (9.6 بلین ڈالر) ہے۔