سات اکتوبر کے حملے میں زندہ بچ جانے والی گلوکارہ کی یوروویژن 2025 میں اسرائیل کی نمائندگی

سات اکتوبر 2023 کو اسرائیل میں نووا میوزک فیسٹیول پر حماس کے حملے میں جب 370 سے زائد افراد ہلاک ہوئے تو یوول رافیل نے لاشوں کے ڈھیر کے نیچے چھپ کر اپنی جان بچائی۔ اب مذکورہ اسرائیلی خاتون کو یوروویژن میں ان کے ملک کی نمائندگی کے لیے منتخب کیا گیا ہے۔

بدھ کے روز 24 سالہ نوجوان نے ریئلٹی ٹی وی شو دی نیکسٹ سٹار جیت کر اس سال مئی میں باسل میں یوروویژن 2025 میں اسرائیل کی نمائندگی کا حق حاصل کیا۔

رافیل نے کوالیفائنگ مقابلے کے دوران اے بی بی اے کا ڈانسنگ کوئین کا بالڈ ورژن پیش کیا اور اس نغمے کو ان "تمام فرشتوں" کے نام منسوب کیا جو نووا فیسٹیول کے دوران قتل ہو گئے تھے۔

سات اکتوبر 2023 کے حملے میں سرکاری اسرائیلی اعداد و شمار کے مطابق 370 سے زائد افراد ہلاک ہوئے اور 44 دیگر کو یرغمال بنا لیا گیا۔

اپریل 2024 میں اقوامِ متحدہ کی انسانی حقوق کونسل کے سامنے اپنی گواہی میں رافیل نے بتایا کہ جب راکٹ فائر شروع ہوا جو حملے کی ابتدا تھا، تو انہوں نے اور فیسٹیول کے دیگر شرکاء نے ایک چھوٹے بم شیلٹر میں پناہ لی۔

انہوں نے کہا کہ جلد ہی حماس کے لوگ پناہ گاہ کے اندر فائرنگ کر رہے تھے۔

انہوں نے کہا، "اچانک میری دنیا تباہ ہو گئی۔ میں نے وہاں پھنسے ہوئے اور اپنی جان کے خوف میں مبتلا ناقابلِ بیان دہشت کا مشاہدہ کیا۔ دوست اور اجنبی میری آنکھوں کے سامنے زخمی ہوئے اور قتل کر دیئے گئے۔ جب قتل ہو جانے والوں کی لاشیں ہم پر گریں تو میں سمجھ گئی کہ ان کے نیچے چھپ کر ہی میں اس ہولناک خواب سے بچ سکتی تھی۔"

انہوں نے بتایا کہ بم شیلٹر میں صرف وہ اور 10 دیگر افراد زندہ بچے۔

"میں نے جو جسمانی زخم برداشت کیے، وہ تو ٹھیک ہو رہے ہیں لیکن ذہنی اذیت ہمیشہ میرے ساتھ رہے گی۔"

سویڈن میں منعقدہ یوروویژن کے گذشتہ 2024 ایڈیشن میں اسرائیل کی شرکت پر احتجاج کے لیے مظاہرے کیے گئے تھے۔